Hoe coninck Kaerl weder in Italien reysde.
Dat XL capittel.
Ter wilen dat coninc Kaerl aldus in Sassen becommert was, is Rutgaudt, coninc Desiderius vrient, die tot Ludick gevangen lach, rebel geworden, denwelcken Rutghaudt, coninc Kaerl bevolen hadde heel Italien te regieren in sinen name, ende had hem gemaect hertoech van Lomberdien ende grave van Forlivien, dats van Aquilegien, bi Veneegen. Mer verhorende dat coninc Kaerl strijende was op die Sassen, ende veer van der hant was, heeft hi mit giften ende gaven vele heren tot hem getogen ende daertoe gebrocht, dat si alle des conincx dienres ende zoudenieren versloegen ende verdreven, ende wert also machtich der landen die hem van den coninc bevolen waren te bewaren, ende dwanck die burgers, dat si hem homage ende huldinge doen mosten. Dit vernemende coninc Kaerl wert seer toernich ende gestoert op desen hertoge Rutghaudt, overmits die grote ondancberheit die hi an hem sach, ende quam sonder vertreck in Italien mit groot swaer volc, ende wan mit stormender ende werender hant die stat Aquilegien, ende dede den hertoge Rutghaudt als overste cappeteyn van desen rebelheit dat hoeft ofslaen, ende stelde al dat lant in vreden als hi Tarvisien ende meer steden gewonnen hadde.
Auteursrechtelijk beschermd