Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Sassen tegen die coninc weder rebelleerden.
Dat XXXIX capittel.

Doe dit aldus in Ytalien volbrocht was, heeft hem coninc Kaerl gehaest in Franckenrijck te comen, want hi sekerlic vernam, dat die Sassens wederom rebelleerden, ende dat si

[p. 67r]

veel scadens van branden ende roven an die palen ende frontieren van Oest-Francken gedaen hadden, ende dat hele dorp Hassij beroeft ende verbrant. Mer die kerck in Fridesler en mochten si niet destrueren noch verbranden. Wanttet also van den heyligen vader Sinte Bonifaes, aertsbiscop van Ments ende na van Uutricht te voren propheteert was, doe hi dese kerck consecreerde ende wijede, voerseggende dat si nemmermeer verbranden en soude. Waerom dat coninck Kaerl vergaerde int jaer VII C ende LXXV een generael dachvert mit alle sine princen, heren ende vorsten int dorp van Carisiaeck, in welcke eendrachtlick gesloten wert ende overgegeven is dat men den Sassens, die geen compact, eedt, soen, overdracht, getrou noch loftenisse en houden, noch nemmermeer vrede onderling en hilden, mitten swaerde tottet kersten gelove soude brengen. Ende corts hierna is coninc Kaerl gecomen mit groot volc van wapenen in den landen van Gulick, in een dorp geheten Duren, daer men alsnu Sint Annen hoeft mit groter reverencie ende eren versoect. Ende quam voert over den Rijn, ende beleyde die stat ende tslot Syberch genoemt, ende heeftet ten lesten gewonnen. Hier en binnen sijn die Sassens als byen tsamen gecroepen, ende hebben belegen die stede Heresburch, die die coninc onlangs daer te voren gewonnen ende mit kersten menschen beset hadde. Ende ter wilen dat die Sassens dese stat belagen, is die glorie Gods verscenen op de kerck in die ogen aller dergeenre diet sien wouden, te weten II rode vuerige scilden hangende in die lucht, ende geluyt onderling op malcanderen gevende, alst in en strijt gebuert. Mer die coninc heeft die stede ontset, ende die Sassens sijn uut Gods vervaernisse voervluchtich geworden. Ende doe die coninc dese stat Heresburch noch bet mit gelovige mannen ende ridderen hadden beset, is hi mit een deel des heers getogen opten riviere die Weser bi den berge Brumesberch, daer die Sassens an dander side van der riviere lagen, mit groot swaer volc, om den coninc sinen voertganck in Sassen lant te beletten. Mer coninc Kaerl Gods hulpe anropende, is haestelic mit houten bruggen over die riviere gecomen, ende heefter op dien dach ontellicke veel verslagen, ende heeft se onder sine subjectie gebrocht. Hierna toech coninc Kaerl in Hoech Sassen, die men hiet Oesterlinden oft Oestphalinghen, bi die rivieren Onaker ende Heese, daer hi twe sware striden bi Gods gracie gewonnen heeft, ende si ghingen al in handen, te weten die van Duringen ende Hessen, die Angerts ende inwoenres van Baick. Ende die coninck heeft se allegader in gracien genoemen, behoudelic dat si alle gader tkersten gelove annemen souden. Ende als hi tslot te Midburch mit veel ander fortressen wel beset hadde, is hi in Franckenrijck getogen, ende van daen weder in Ytalien, int jaer VII C LXXVI.