Hoe coninc Kaerl die Sassens eerst bevacht.
Dat XXXVII capittel.
Int jaer VII C ende LXXII, doe Adrianus paeus van Romen was, heeft coninc Kaerl gehouden een concilium ende dachvaert in der stat van Worms opten Rijn, mit sijn vorsten, princen ende heren, om dat hele lant van Sassen te bevechten ende onder dat kersten gelove te brengen. Ende also Sassen hier voertijts een groot ende wijdt lant was, so ist te weten, dat Sassenlant in III delen gedeelt is. Dat eerste deel is nu genoemt West-Phalen, ende is gelegen in die westside van tlant van Sassen, niet veer van den Rijn; ende die wonen an die oestside sijn genoemt Oesterlinden oft Oestphalen. Ende dit lant wert van II rivieren gedeelt, dat is die Elbe tot an den Rijn, als men leest in der legende der tweer Ewalden; die ander rivier hiet die Wesar, ende die inwoenres sijn genoemt Westphalers, want dat deel des lants westwert leyt. Mer nu ter tijt noemt men slechtelic dat lant tusschen die Wesar ende die Elbe geleghen Sassenlandt, ende die wonen van der Weser of totten Rijn toe, die hiet men Westphalingen, in der welcken middelste regioen ofte lantschap wonen die Angers, ende strecket tot Slavonien toe. Tegens desen is te stride getogen coninc Kaerle van Franckenrijck mit swaer volck van wapenen, ende heeft sonder vertreck hoer alre starckste slot, Heresburch genoemt, vechtenderhant ingenomen, ende horen princepalen afgod Irvivisul, dair si allen horen hoop in plegen te setten, vernyelt ende ter aerden geworpen, mit groten arbeyt. Ende siet, doe des conincs volc groten smart van dorste leet, heeft God doer des conincs innich gebet enen drogen beeck mit overvloedich water gevolt, daer si horen dorst soetelick mede ghelaeft hebben. Ende als die coninck desen hoecke lants inghenomen hadde, is hi mit XII heren, die hi nam van den Sassens tot een onderpant, hoere subjectie mit groter triumphen, glorien ende victorie wederom in Franckenrijcke ghetogen.
Auteursrechtelijk beschermd