Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Keyseren

Anno VIII C. ende een.

Karolus, die alre glorioeste ende onverwinlicste coninc van Franckenrike, coninc Puppijns die Cleine ende Baertraert oft Berthe, keyser Eraclius dochter van Griekens zoen, wert keyser gecoren ende gemaect int jaer VIII C ende een, van Leo den paeus die III, als voorscreven is; ende wert geheten die grote Kaerle om sine grote looflicke feyten van oerlogen ende victorien, die hi gehadt heeft in vele landen, sonderlinge tegens die heydenen ende ongelovigen persequeerders der Heyliger Kercken. Dese Kaerl is geboren opten Rijn tot Inghelheim in Rinckauwe, waerom die selfde plaets noch ter tijt dat keiserrijck toebehoert. Ende daer was een out pallaes getimmert, dat naderhant hertoge Robbrecht van Beyeren, palensgrave ende Roomsche coninc, vermaecte, ende coninc Kaerl van Bemen, keiser van Romen, seer verbeterde, in der gehoechnisse van desen groten Kaerl, die daerop geboren was, ende hebben daer gesticht een collegie van canonicken reguliers. In desen coninc Kaerl die Groten lopen te samen III geboorten ende geslachten, als der Grieken, der Romeinen, ende der Duytschen. Waerom dat oec niet sonder saec noch vermetelic dat rijck in desen coninc Kaerl translateert ende overgeset is. Ende als sijn broeder Kaerleman gestorven was, began hi alleen te regeren, int jaer ons Heren VII C ende LXXI. Ende in dit selfde jaer heeft coninc Kaerl een grote dachvaert ende concilium generael mit alle sine edelen princen ende heren ghehouden in een dorp ghenoemt Carbonata.

[p. 66r]

Tot welcke vergaderinge oec ghecomen sijn alle die vorsten ende princen die sijn broeder Kaerleman plegen te dienen, uutgenomen Gryberta, Kaerlemans wijf, ende Anclaris, een Fransch heer, die te samen hoeren toevlucht namen tot coninc Desiderius van Lomberdien ofte Ytalien. Voert heeft tegens desen coninc Kaerl alre eerst rebelleert hertoge Hunaldus van Aquitanien oft Langedock, tegen denwelken coninc Kaerl sijn alre eerste heervaert ende strijt angenomen heeft, ende is mit een groot crachtich volc gecomen in Aquitanien, ende timmerde aldaer tegens die stat van Bourdeus over een swaer slot, genoemt Fronciacum. Hertoge Hunalt dit merckende is voervluchtich geworden ende tot Romen getogen, recht oft hi daer rusten wilde ende tkersten gelove ontfangen; mer hi is onlancxs van Romen totten Lomberden getogen, ende aldaer als een apostaet ende verlochent kersten mit stenen gedoot. Na wiens doot coninc Kaerl ordineerde biscoppen, abten ende graven in Aquitanien, tot Goeds eer ende voertganck des geloves, ende heeft sinen soen Lodewijck coninc van Langedock gemaect; ende heeft also mit rusten den heyligen Kersdach mit groter blyscap celebreert in Anttiniaken.