Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Paeusen

Anno VII C XCVI.

Leo die III was die C paeus, ende sat XX jaer, V maenden ende XVIII dagen; een seer geleert man, reyn van leven ende wèl sprekende, een beminre der geleerden, een vertrooster der armen, ende een bescermer der weduen ende wesen. Dese Leo, gaende in der processien op Sinte Marcus' dach, wert hi after of getogen, overmits een ghemaecte oploep van II Romeinen, als Paschalis, sancmeester, ende Campulus, priester, ende sloegen hem seer deerlic, ende worpen hem ter neder, ende sneden hem die tonge of, ende staken hem sijn ogen uut, ende leyden hem doe in ene duystere karcker. Mer God van hemelrike en liet sinen trouwen knecht ende dienre niet ongestroost, ende heeft hem zijn sprake ende gesichte wedergegeven²⁶¹, ende is ten lesten doer cloecheit ende behendicheit sijns camerlincs uuten karcker verlost ende in Sinte Pieters

261 weder geguen AB.

[p. 65v]

Kerck gebrocht, daer hi also lang verholen bleef, totdat hem die hertoge van Spoleten brochte in sine stat van Spoleten, ende vandane is hi getogen totten groten coninc Kaerl van Franckenrijck, ende gaf hem te kennen, ende claechde den grote overlast ende tverdriet dat hem die Romeinen hadden gedaen. Coninc Kaerl dit horende, heeft den paeus mit veel volcs weder te Romen gesonnen, ende daerentusschen maecte hi vrede mitten Sassen tot Padeborn; ende hi quam na tot Romen, ende daer wert alle twist ende discoorde ter neder gheleyt. Ende als die paeus hemselven purgeert hadde van tgene dat men hem op seyde, is hi weder mit groter solemniteyten in sijn paeuslicke stoel geset. Die paeus Leo begerende den coninc voer sijn weldaet dancbaerheit te bewisen, heeft hem bi rade der cardinalen ende bisscoppen, die in groten ghetale uut Walslant ende Ytalien tot Romen ghecomen waren, opten heyligen Kersdach onder die misse keyser van Romen gemaect ende gesalvet, mit gonst ende goetwillicheit der Romeinen, roepende mit groter bliscappen: 'Den groten Kaerle, van God gecroont ende vreedsamigen keyser, si altijt leven ende victori!' Ende sinen soen Puppijn²⁶² noemde hi coninc van Ytalien. Ende aldus heeft Kaerle die Groot dat keyserrijck weder angevaert, na dattet over III C ende XXX jaer, overmidts den overval der Gothen, vergeten ende uuten gewoenten ghecomen was. Ende als dese paeus Leo vele doechtlicke wercken gedaen, ende dat scone gasthuys bi Sinte Pieters Kerck gesticht hadde, is hi gestorven, ende mit groter eren ende wenender uutvaert tot Sinte Pieters begraven.

Hier anvolcht nu die historie op tcorste des groten coninc Kaerl van Franckenrijck, ende die eerste gecoren keyser van Romen, van der Francken ende Duytschen nacye ende gheslachte, uut vele diverse croniken copuleert ende ghetogen.

262 pnppijn AB.