Hoe dat aertsbisdom van Uutrecht hier te nyete ghing, ende wert voertan een slecht simpel bisdom ende suffragaen des aertsbiscops van Coellen.
Dat XXXI capittel.
Soe is dan dese heylige man Gregorius geworden na Sinte Bonifaes die III bischop van Uutrecht, ende aftervolchde oec die pleyte ende tgerechte datter angheleyt ende begonnen was int hof van Romen tegen den aertsbischop van Coellen, Hilger genoemt, om die aertsbiscoplicke benedictie ende infule ofte mytre. In denwelcken hi hem sere wijslick ende voersichtich hadde. Mer lacen, corts hierna quamen die Denen ende Noermans, ende verwoesten alle dat gantse Sticht van Uutrecht, als Hollant, Zeelant ende Vrieslant, ende sloegen dat volck meest doot, ende namen mit hem wiven ende kinderen mit enen groten roef, ende verwoesten ende destrueerden dat lant also, datter ghene bouman ghebleven en was om tlant te bouwen; waerom dat van groter armoede dese biscop Gregorius dat hof van Romen niet vervolgen en mochte om die aertsche biscoplicke benedictie te ontfangen, want die kercke ende aertsche biscop van Coellen te rijck ende te machtich was tegen te pleyten. Ende heeft daeromme van noots wegen ende armoede simpele benedixie moeten nemen van horen naesten geseten biscop, als van den aertsbiscop van Coellen. Ende mosten lange menigen tijt misse doen gelijken abten, sonder biscoplicke mytre, totter tijt dat here Godebalt biscop van Uutrecht worde, ende was int jaer M C ende XII of daer omtrent. Die aertsbisscoppen van Coellen en hadden niet meer dan enen suffragaen: dat was die biscop van Ludick; ende wert die biscop van Uutrecht die anderde. Die ander III, als Monster, Minden ende Osenbrugge, sijn na angecomen. Dese heylige man Gregorius, nadat hi biscop geworden was, gaf hi hem seer tot goedertierenheit ende miltheit, versmaende boven maten die ghiericheit, wetende dat si van alle quaet die wortel is. Hi verwerf oec mede dat coninc Kaerl die Grote van Frankenrijck confirmeerde ende vestichde alle die privilegien, goeden, renten, thienden ende chijnsen, die sijn ouders Kaerl Marteel, Puppijn, Kaerleman ende sijn vader coninc Puppijn die Cleine der kercken van Uutrecht gegont, gegeven ende confirmeert hadden, die te behouden ende besitten in een ewich testament.
Auteursrechtelijk beschermd