Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Gangolf mit Sinte Wolfran, biscop van Senoveren, Oest-Vrieslant ende West-Vrislant mede halp bekeren.
Dat XXVII capittel²⁵⁰.

Dese heylige ridder ende grave in Borgondien, Gangolf, is mitten eerwaerdigen vader Sinte Wolfran, aertsbiscop van Zenoveren, daer wi voer of gescreven hebben, mede in West-Frieslant gecomen, ende heeft alle dat gantse lant mitter stat Medenblic daer coninc Rathbolt van Frieslant sijn coninclicke woenstat hilt, doer gheleerde mannen ende priesteren, mitten biscop voornoemt, ende mitten swaerde ende vrese des conincs Puppijns, totten heiligen gelove gebrocht, wanttet hadde tevergeefs van den doctoren ende priesteren gepreect

250 CII door beschadiging van de a AB.

[p. 63r]

geweest, ten waer dat coninc Puppijn doer²⁵¹ desen vromen ridder ende prince Gangolf gewapenderhant onderstant gedaen. Waeromme dat Gangolf een heel jaer lang in Frieslant bleef, omtrent Medenblic, by den heyligen biscop Wolfran voornoemt, ende began tot Oestwoude doer begeerte des biscops voornoemt een kerck te timmeren. Ende siet, op een tijt als hi tsavonts sat an der tafelen, ende at by den heyligen biscop, ende onderling mit malcanderen van die Heylige Scriften ende van tgelove Cristi te vermeren spraken, worde hi mitter flamme ende begeerte der martelie hertelic ontsteken, ende sprac totten biscop aldus: 'O heylige vader ende here, ic voersie dat onsen arbeyt in desen landen onlancs vergaen sal, tensi dat wi oec den Oest-Friesen ende Denen brengen totten gelove Cristi; want si sullen dit lant, omdat si tgeloef angenomen hebben, weder overvallen, als sie voermaels hebben gedaen, angesien dat die coninc van Denemarcken die coninc Rathbolts dochter te wive heeft, ende sal hieruut oersaeck nemen om sijn sweers leet te wreken, ende tgeloef hier begonnen vernyelen, ende sijns wijfs vaders rijck, dats Frieslant, besitten. Want nu coninc Rathbolt gestorven is ellendelic ende haestelic, sal hi dit lant willen conquesteren ende innemen. Och, of ic waerdich waer, ende die coninc der Denen hier int lant quame, mijn bluet voer tgeloef Cristi te storten, of hem mitten swaerde te verwinnen.' Nadat dese heylige ridder ende grave Gangolf dit gesproken hadde, sach dese heylige biscop een scoen licht staen op Gangolfs hoeft, mer het scoot onlancs zuytwestwert op daerof. Dit merckende die heylige aertsbiscop van den Heyligen Geest ende van binnen verlicht, seyde aldus: 'O vrome vorst, prince ende ridder Gangolf; weet dat God dijn begeerte verhoort heeft; mer het sal op een ander plaets in dijn lant ende van dijn naeste gescien ende volbrocht worden.'

251 dour AB.