Hoe dat Sinte Gangolf, een graef in Borgondien, een fontein cofte in Waslant, ende die doer zijn gebet opspringen dede int graefscap van Borgondien.
Dat XXVI capittel.
Op dese tijt is van groter name ende fame geweest die heylige man ende ridder Gangolf in Borgondien. Dese here Gangolf diende lang dat huys der Fransser heren onder Puppijn, ende was mede in den strijt die coninc Puppijn hadde tegen die Saracenen ende Wandelen in Langedock, ende oec een van den XX princen die verslegen waren ende doir verdienste des alre heylichsten man Sint Jans Baptisten hooft, dat doe eerst in Vrancrijc quam, verwect worde van der doot, als dat die legende inhout. Comende na desen strijt ende dit grote mirakel Sinte Gangolf uut Aquitanien ofte Langedock, om thuys in Walslant te varen, quam hi mit zijn dienres in een groen velt, daer een scone fonteine van claren water in stont, ende stelde hem dair ter neder om een luttel te rusten ende te eten. Dit siende diegene dien dit lant ende fonteine toebehoorde, quam angelopen mit een toernigen sin, beclagende den heyligen ridder Gangolf dat hi hem grote scade dede mit zijn paerden ende knechten in zijn gras ende sate. Ganfolf versachte des mans toernicheit met soeten woorden, ende seyde: 'Mijn lieve heer ende vrient, en belcht u niet, dat ic hier sitte; want ic begheer van u dese fonteyn te copen.' Die man horende Gangolfs simpelhede was seer blide, ende vercoft hem om sekere penningenGa naar voetnoot249 sine fonteine, menende dat hi te min waters niet hebben en soude. Mer God, een bekenre alre herten, heeft geplaecht des rijcken mans ghiericheit, ende heeft hoechlic verheven sijns ridders simpelheit; want nadat Gangolf thuys quam, ende hem zijn bose wijf gestraft hadde van sine sotte comanscap, ghing hi buten zijn hof, ende stac aldaert hem beliefde zijn staf in der aerden, ende daer is onlanxs, doer Goeds gracie, Die mitten simpelen wandert, die fontein mit alsulcke grootheit ende gedaente des waters gecomen ende ontsprongen, als hij se in vreemden ende verden landen gecoft hadde; also dat des rijcken mans ghiericheit dairin bedrogen bleef, ende Gangolf volstandich geloef na den woorden Goeds int Evangely worde voer allen menschen verclaert.
Auteursrechtelijk beschermd