Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Bonifacius resigneerde dat aertsbisdom van Ments, ende wert die anderde aertsbiscop van Uutrecht.
Dat XIX capittel.

Ende als Sinte Bonifaes dat bisdom van Ments omtrent XXI jaer lang eerlicken berecht hadde, vernam hi doer Godlicken inspreken ende bi gemeenre fame, dat die eerwaerdige ende heylige man Sinte Willeboort die eerste aertsbiscop van Uutrecht gestorven was, soe heeft hi een sinodus van veel biscoppen ende prelaten, princen ende vorsten doen vergaderen, ende heeft doer speciael auctoriteyt ende macht des stoels van Romen resigneert ende over-

[p. 60r]

gegeven dat bisdom van Ments; ende heeft daer wederom ingeset, institueert ende ordineert bi gemenen rade ende consente der prelaten ende princen dier vergadert waren den eerwaerdigen ende geleerden man, zijnre moyen soen, geheten Lullus, ende heeft hem tot Romen gesonnen om die biscoplicke benedictie ende wiinge, dwelc also gesciet is. Ende als dit gedaen ende aldus geordineert was, heeft die heylige²⁴³ biscop Bonifacius vergadert een deel geestlicke mannen, die hem daertoe dochten nut ende oerbaer te wesen, ende is tscepe gegaen, ende quam gevaren den Rijn neder totter biscoplicker stat van Uutrecht, dien hi vant, overmits Sinte Willeboorts doot, geheel desoleert ende verstroyet, omdat si sodanigen sorchvoudigen harder verloren hadden, ende heeft die bi consent des paeus van Romen ende des princen Kaerl Marteel angenomen²⁴⁴ te regeren, opdat dat volc van Hollant, Zeelant ende Vrieslant, dien hi wilen eer mit groter naersticheit ende arbeyt hadde helpen bekeren ende brengen totten heyligen geloven, niet wederkeren oft comen en souden totter ongeloviger afgodyscap, mer opdat hij se mocht houden in die vreese ende minne Goeds. Ende aldus is hi geworden ende geordineert die anderde aertsbiscop van Uutrecht na Sinte Willeboort.

243 deylige AB.

244 angenonen AB.