Hoe dat Sinte Bonifaes stichte ende fondeerde een canosye binnen Uutrecht, geheten Sinte Salvatoers ofte Oude Munster.
Dat XX capittel.
Dese heylige ende eerwaerdige biscop Sinte Bonifaes woude vermeren den dienst Goeds, ende sticht int jaer ons Heren VII C ende XXXVIII een canonicke cloesterkerck in der stat van Uutrecht, al vast by den bedehuse des Heyligen Cruys; ende dese kerck hiete Sinte Salvatoers Monster oft Oudemonster, want si nye vernyewet is, ende staet noch in sine structuren ende edificien also als si Sinte Bonifaes doen timmeren ende maken heeft. Ende sette hierin XL canonicken, gelijken als in die hooftkercke waren, die Sinte Willeboort gesticht hadde, die dach ende nacht den dienst Goeds daer stadelicken deden. Sommige luden willen seggen, dat Sinte Willeboort dese kerck eerst stichte, ende provende daerin LXXX canonicken, daer dieselve Sinte Willeboort XL weder uutnam ende sette se in Sinte Martijns kercke; mer ist so, so blijftet so. Mer men vintet in genen privilegien, historien ofte cronyken, dattet also is, mer men vint wel, dat Sinte Bonifaes Sinte Salvatoers Monster stichte, ende dat hi maecte dat die canonicken van der hoeftkercke van Uutrecht, ende die canonicken van Sinte Salvatoers Monster souden mit malcanderen minlic broederscap houden, gelijc of si een collegium waren.
Auteursrechtelijk beschermd