Hoe Sinte Wilfrijdt voornoemt gecoren ende geordineert wert tot enen aertschen biscop van Ments.
Dat XVIII capittel.
Als nu dese heylige priester Wilfrijt lange jaren in desen landen dat Woort Goeds gepredict, ende tvolc totten heyligen kersten gelove gebrocht hadde, so wert uut desen sinen naem ende faem seer vierlic ende bekent. So geboerdet dat op die tijt uut deser werlt sceyde die biscop van Ments opten Rijn, waerom dat Kaerl Marteel mit alle zijn princen ende heren ende andere geestlicke prelaten vergaerden een concilium na des biscops doot van Ments, ende ordineerden ende coren daer desen Wilfridum tot enen biscop tot bekeringe der ongeloviger, ende senden hem sonder vertreck tot Romen totten paeus om die biscoplicke benedictyeGa naar voetnoot240 te ontfangen. Datwelke die paeus Gregorius die II mit groter eerwaerdicheit endeGa naar voetnoot241 feeste gedaen heeft, ende gaf hem enen nyewen naem, ende hieten, overmits zijn goede wercken, Bonifacius, ende consecreerden in enen aertsbiscop van Ments, int jaer VII C ende XV; ende was dye eerste aertsbicop, wanttet voermaels een slecht bisdom was, ende besat dat XXI jaer. Ende als hi aertsbiscop geworden was, so sette hi van macht des paeus Zacharias ende Pipimus des hertogen van Lottrijck ende van Brabant noch II nyewe bisdommen, als tot Eysteden sette hi den eersten biscop Sint Willibaldt, ende was een van Sinte Willeboorts gesellen, die mede uut Engelant gecomen was, ende was Sinte Winibalts ende Sinte Walburchs broeder; ende dit was int jaer VII C ende XL. Dat ander bisdom sette hi tot Wirtzburch, ende sette daer den eersten biscop, Sinte Burchaert; ende dit was int jaer VII C ende LI. Ende hi dede bouwen ende maken dat vermaerde ende costlicke cloester tot Fulden, in der woestinen van Betonien, biGa naar voetnoot242 Ments van Sinte Benedictus oerde, ende is nu een rijcke ende grote abdye van macht ende mogentheit oft weinich minre dan die biscop van Ments.
Auteursrechtelijk beschermd