Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Dat XVII capittel.

Van Sinte Bonifaes, die anderde aertsbiscop van Uutrecht.

Bonifacius, die die eerste aertsbiscop van Ments was, wert na Sinte Willeboorts doot die anderde aertsbiscop van Uutrecht in deser manieren. Doe Sinte Willeboort die heylige biscop noch int leven was, quam tot hem uut Engelant een gheleert man ende priester, genoemt Winfridus, dien Sinte Willeboort mit groter reverencien ende bliscappen ontfing, ende sende hem in Neder-Vrieslant, om daer dat volc mit goeder leringe ende doechtlicke wercken int gelove te starcken, ende den ongelovigen, dier noch veel waren, totter rechter kennissen des geloves te brengen. Dat welcke hi XIII jaer lang naerstlic volbracht heeft²³⁹, na Sinte Willeboorts begeerte ende bevele. Als nu die heylige priester Win-

239 heet AB.

[p. 59v]

fridus dese jaren voorscreven in Vrieslant den volcke dat Woort Goeds gepreect ende geleert hadde, begeerde hi oerlof an Sinte Willeboort, om tot Romen te trecken, ende visiteren die heylighe apostelen Sinte Pieter ende Sinte Pouwels, dwelcken Sinte Willeboort minnentlicken consenteerde, wetende sekerlic in den geest dat God noch grote wercken doer hem doen wilde. Comende tot Romen wert hi van den paeus Gregorius die anderde eerlicken ontfangen, ende anmerckende zijn grote heylicheyt ende leringe, heeft hem wederom gesent als een legaet des stoels van Romen om beneden tgeberchte ende tot allen plecken (daer tgeloef Cristi noch niet gecondicht en was, of daert die ketteren verkeert ende bevlect hadden) mit volle auctoriteyt ende macht te prediken, ende mit zijn heylige woorden alle oncruyt der ketterien ende afgodien uut te roden. Dwelc hi doer tgebot des paeus voornoemt mit groter naersticheyt ende innicheit volbrocht heeft. Ende is getogen int lant van Duringen ende Hessen, dien hi mit vueriger predicatien der Heyliger Evangelien totten rechten gelove van der afgodyschap brochte, ende uuten lande alle ketterien verstroyede ende verdreef.