Keyseren.
Anno VII C ende XLIII.
Constantijn die V wert keiser na sinen vader ende regeerde XXXIII jaer, een navolger sijnre vaderlicker boesheit, versmaende die statuten, wetten ende ordinancien der Heyliger Kercken; ende heeft alle die tijt sijns levens mit wichelyen, toeverien ende onsuverheden over gebrocht. Ende dede overmidts des patriarchs van Constantinopel een grote vervolginge onder den kersten menschen, sodat si Dioclesiaens vervolginge vol na gelijck was. Hi dede tot Constantinopel houden een concilium van III C ende XXX biscoppen, gebiedende ende ordinerende dat men gheen beelden der heyligen in der kercken oprechten noch setten en soude, dwelck die onghelovighe Beemers ende Hussitten opten dach van huden onderhouden. Alle kersten geestlicke menschen die hem onthilden van onsuverheden, of die beelden ende heylichdom bi hem hadden, dien benam hi hoer goet, ende dede se groot verdriet ende pijn an, ende warp dat heylichdom int water oft int vuer. Hi dwanck oec den geestlicken monicken dat si die besloten nonnen tot hoer echte wiven nemen mosten, ende die dat niet doen en wouden liet hi jammerlic doden; waerom dat die paeus Paulus hem dede vermanen, dat hi der heiliger beelden weder restitueren ende opsetten soude, ende ophouden van der vervolghinghe der kersten menschen, of hi woude hem excommuniceren ende in den banne doen. Mer hij en achtes niet, ende aldus leyde die paeus die ewige maledictie op hem. Bi sijnre tijt nam dat keyserrijck tot Constantinopel sere of, want die heyden ende Saracenen wonnen vele steden ende sloten in Griecken; ende die heren van Franckenlant namen an hem ende worden heren van Duytslant ende Walslant. Hoe ende in wat manieren hi sijn leven liet, en weet men niet, dan dat hem God plaechde mit sulcken hetten in sijn lijf, dat hi noch levende riep: 'Ic bin int onverganclicke vuer gheworpen!' ende mits desen scheyde hi van hier, wesende in der ewigher maladictie ende banne des paeus.
Auteursrechtelijk beschermd