Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Sinte Willeboort ende Sinte Swigbert oflivich gheworden sijn ende begraven.
Dat XIIII capittel.

[p. 58r]

Dit geseit van den discipulen, so willen wi wederkeren totten meester Sinte Willeboort, die altijt tot Uutrecht bleef ende int Sticht van Uutrecht lerende mit groter vuericheit allen menschen dat heylige kersten gelove, die ander van sijn medegesellen in diverse plecken verstroyt wesende om den ongelovigen dat Woort Goeds te condigen. Ende siet, om tot een eynde te comen, so heeft die heylige man ende biscop Sinte Swigbert, mit een cusse des vredes van den heyligen biscop Willeboort ende an den anderen heren ende canonicken van Uutrecht, oerlof genomen, ende is getogen mit enen genoemt Willeicus, priester, ende meer andere in West-Phalen ende Neder-Sassenlant, ende hevet aldaer, doer zijn vuerige predicacie, veel volcs tot Cristum bekeert, ende veel kercken in diverse plaetsen²³⁶ gewijt. Comende op een tijt in die grote stat Minimigardum, die nu Munster hiet, heeft een vrouwe die in hoer leden vercrompen was, genesen, ende een blint mensche siende gemaect. Waeruut dat hi veel volcs bekeerde totten gelove. In Billevelt, gelegen in Westphalen, heeft hi een man van der squinancie in der kelen genesen, van welke passie hi noch een sonderling maerscalc is. In Bruynswijc heeft hi een vergicht man genesen, ende veel volcs totten gelove bekeert. Ten lesten is dese heylige priester Swigbert ende biscop, doer Goeds ingeven tot Coellen getogen, totten hertoge Puppinus van Brabant ende sine devote huysvrouwe Plectrudis oft Blijtart, die hem een plaetse gegeven heeft te bliven doir consent van horen man, die doe in Joppilie was, ende oec bi consent des bisscop van Coellen, genoemt Anno. Ende dese plaetse was genoemt Werde, ende hiet nu Keyserswaert. Ende heeft veel gouts ende gelts ontfangen van den hertoge voornoemt, om daer een kercke te maken, ende dat rude volc totten gelove te brengen, dat welcke hi getrouwelic ende mit groter naersticheit gedaen heeft; ende die kercke in der eren van Onser Liever Vrouwen gewijt, ende in alle die dorpen dair omtrent dat geloef Cristi gecondicht, ende een doot mensche verwecket ende levendich gemaect. Hierna heeft Swigbertus doer hulp ende bistant der vorsten ende princen een cloester in die stede van Keyserwaert getimmert, in denwelcken hi Willeycum, die eerste canonick van Uutrecht, proest geordineert heeft, die mitten exempel der goeder conversacie veel geleerde mannen uut Coellen ende elwerts tot een cloesterlic leven gebrocht heeft, ende dat volc omtrent wonende dat kersten gelove geleert. Ende dese Willeycus was proest van den cloester voornoemt tot Keyserswaert, X jaer lang na Sinte Swigberts doot. Ende dese biscop Swigbert starf opten eersten dach van maert int jaer ons Heren VII C ende XVII, ende wert van Sinte Willeboort ende van zijn selves discipulen begraven in presencie der edelre vrouwen ende hertoechinne van Brabant Plectrudis oft Blytert, daer zijn aenscijn blijncte als een sterre; ende zijn celle was rukende als een apteke, ende heeft binnen sinen leven ende na zijnre doot vele wonderlicke miraculen gedaen, als men in zijn legende bescreven vindt. Ende als die heilige man Sinte Willeboort weder tot Uutrecht gecomen was, heeft hi zijn bisdom doergelopen, ende dat Woert Gods overal mit groter soeticheit ende innicheit gepredict, ende vele miraculen gedaen binnen sinen leven ende na zijn doot. Ende na vele goeder wercken is hi siec geworden, ende starf int jaer ons Heren VII C ende XXXVI, als hi dat aertsbisdom van Uutrecht berecht hadde omtrent XL jaer. Ende zijn lichaem wert gevoert in een cloester genoemt Epternaken, gelegen op die Moesel bij Tryer, van Sinte Benedictus oerde, dat hi binnen sinen leven²³⁷ van die goeden ende patrimonye zijnre discipulen ende andere religose ende kersten menschen in die ere van der Heyliger Drievoudicheit gesticht ende fundeert hadde. Van sine gesten ende miraculen vint men int Passionael

236 plaeten AB.

237 lenen AB.