Hoe Sinte Werffoert, Aelbrecht, Mercellijn ende meer andere oec uutgesonnen werden.
Dat XIII capittel.
Onder dese discipulen voerseit is oec geweest die heylige priester Werenfridus of Werffert, een glorioes preker. Dese heylige man heeft een priesterlike woninge gesticht buten Medenblic, waerof dat dorp noch sinen naem voert, ende is genoemt Wervershof, ende also bi der hant te bliven ende den Vriesen mit horen coninc Rathboldt die tot Medenblic woonde te bat totten heiligen gelove te brengen, mit stadiger preken ende bi wesen; mer naderhant is dese heylige priester Werenfrijt vanGa naar voetnoot235 Sinte Willeboort gesent mitten heyligen biscop Swigbert in die grote stat van Wijck te Duersteden, als voir geseyt is. Ende is van daen, bi raet van Swigbert, gesent in die Neder-Betue, tot Elst ende Westervoert, daer hi tvolc tot kennisse ende totten heyligen gelove gebrocht heeft, doende vele miraculen in sijn leven ende na sijn doot, ende is gestorven tot Westervoert op Onser Liever Vrouwen Hemelvaertsavont, ende bi miraculen tot Elst begraven. Mit Sinte Willeboort, als voer geseyt is, quam oec uut Engelant Athelbertus, des heyligen martelaer, ende conincs Oswald soen van Engelant. Dese is die eerste archidiaken ende domproest van Uutrecht geweest, ende predicte bisonder in Hollant onder die Kenemers tot Egmont, daer hi oec een Goedshuys maecte, ende woende bi een goet man, Eggo genoemt, ende brocht alle tlant daeromtrent tot Cristus' kennisse ende geloef; daer hi oec na een heylich leven gestorven ende begraven is. Op welcs graf die kersten menschen een kerck timmerden die van den Denen ende Noermans dicwils verbrant ende gedestrueert worde, nochtans overmits Goeds gracye ende miraculen dier geschieden, isser altijt een gebleven, die Sinte Aelbrechts graf ende lichaem in eren hildt. Onder desen heyligen mannen ende discipulen was oec een uutgelesen heylich geleert priester, genoemt Marcellijn, die Sinte Willeboorts ende Sinte Swigberts legende, leven ende histori bescreven heeft. Dese heilige priester Marcellijn heeft omtrent LXV jaer stadelick gepreect ende den heydenen bekeert totten heyligen gelove, te weten V jaer eer Sinte Willeboort biscop worde; XL jaer onder Sinte Willeboort; XVI jaer onder Sinte Bonifaes biscop ende martelaer ende IIII jaer onder Sinte Gregorius, biscop van Uutrecht, van denwelcken dese Marcellijn mit sijn lantsman Lebuijn naderhant gesent is tot Deventer, om den heydenen ende ongelovigen van Overysel den naem Goeds te kondigen; ende heeft die plaetse Oudezael genoemt, mit Trenten, Twenthen, Coeverden ende Deventer gheregeert, ende alle tvolck doer Goeds voersienicheit totten kersten gelove gebrocht ende gedoopt.
Auteursrechtelijk beschermd