Puppijn van Landen die eerste hertoghe van Brabant.
Dat XXXIII capittel.
Puppijn Karlemans soen wert prince na sinen vader als men screef VI C ende XV, ende hi stont vromelic bi den coningen van Francrijc gelijc zijn voervaders hadden gedaen. Ende hij nam te huwelic des hertogen dochter van Aquitanien, geheten Ydelburga oft Itta. Ende die grote coninc Lotharijs voergheseyt int XXX jaer zijns rijcs, ordineerde hem dat Puppijn ende sijn nacomers souden sijn die meeste regeerders ende swaertdragers des huys van Francrijcks, ende maecte hi den eersten hertoge van Brabant ende Neder-Oestrijck, oft anders geheten Clein Lotrijck, dwelcke is gelegen tusschen den Rine ende die Scelt, om dat van den coningen van Francrijck te lene te houden. Oec hadde hi te regeren van des conincs wegen tlant van der Elven totter Moeselen. Hi was een wijs duechtlick ende rechtvaerdich prince, ende sinen here den coninc getrouwe; hi en dede oec niemants ongelijc om des conincs wille, also die regeerders gemeenlic plegen; noch hi en nam gheen gaven van yement om trecht te corrumperen, alsoet nu dagelicxs eylacen dicwils gebuert. Also minde hi den aertsschen coninc, dat hi den hemelschen coninc nochtans boven hem eerde. Waerom dat hem coninc Lotharijs in groter waerden hadde, dien hi bevant God te minnen ende tot hem ghetrouwe wesende, ende hi beval hem sinen sone Daghobert te regeren, also hi noch jonck was. Dese coninc Lotharijs starf int jaer V C ende XXV.
Auteursrechtelijk beschermd