Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den oerspronc ende beginsel des hertoechdoms van Brabant.
Dat XXXII capittel.

In den tiden dat Chilperijc coninc van Francrijk was woende op Hapesgouwen in Brabant een duechtlic prince genoemt Karleman, ende woende te Landen, dwelcke doe een grote stat was; ende was in den jare ons Here V C ende LX. Ende hi hilt hem gemint mitten coningen van Francrijc, ende diende hen in striden, want hi zijn lant van der cronen meest te lenen hilt; ende was dicwils bi den coningen, hem altijt in wijsheden lerende ende onderwisende. Dese coninc Chilperijck voerseit was die III kersten coninc van Francrijc, die welke na andere huwelicken nam ten derden male te wive sine amye oft vriendinne geheten Fredegondis, die een dat subtijlste ende scalckste wijf was, daer men ye of las, ende daertoe sere oncuysch

[p. 50v]

van leven, ja, oec nadat si coninginne was. Want si hadde enen buel die groot ende machtich was in des conincs hove, geheten Landrick, bi den welcken si haren here ende coninc dede vermoerden; ende noch oec daerenboven: een luttel tijts te voren hadde si doen doden deerlicken sinen lieven sone. Dese Fredegondis hilt van den coninc Chilperijck enen jongen sone van IIII maenden, geheten Lotharius; ende hiete namaels die grote Lotharius, daer wi hiervoer of gesproken hebben. Ende si hadde enen groten strijt omtrent Soyson tegen coninc Hildebert van Oest-Francrijcke, die mit groter heercracht op haer quam, omdat si horen here ende coninc, die sijn oom was, hadde doen doden, leggende die sake op desen coninc Hildebert, uutgevende dat hijt hadde doen doen. Mer bi cloecker subtijlheit hebbende haer jonck kint in hoer armen, so vercloecte si in der dageraet des smorghens die Oest-Francken die noch sliepen, ende versloech een alten groten menichte van volck mit hulpe van desen voerscreven Landrick, die si verhief ende maecten oppersten regeerder van Vrancrijck. Ende dese coninc Lotharius wert namaels coninc van Oest-Francrijck, daer Brabant in begrepen is mitten lande van Hollant ende Vrieslant, ende voert van West-Francrijck, daer Parijs inne leyt, ende van Bourgondien; ende regeerde XLIIII jaer. Dese Kaerleman voerscreven, wonende in die grote stadt van Landen, regeerde in Brabant ende op Haspegouwen LV jaren. Ende al ist dat men van hem niet vele in der cronijken bescreven en vindt, so is hi nochtans groot te rekenen, van wien soe vele heylighe vruchten ghecomen sijn als men in den Cronijcke van Brabant bescreven vindt.