Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Wie dieghene waren die West-Frieslant eerst bewoenden.
Dat XXXI capittel.

Also ic in sommige oude croniken gevonden hebbe, so is West-Frieslant eerst bewoent geweest in den jare na ons Heren geboert III C van V heren ende edelen, als van enen genoemt coninc Diderick van Frieslant, daer coninc Radbout of gecomen is. Ende dese hadde sinen woenstat ende coninclicken stoel in Medenblic. Die ander was genoemt here Geraert uuten Woude, ende plach te wonen int dorp genoemt Opdijck. Die derde hiete Roelant van Weernesse, ende hadde een groot casteel staen int dorp van Widenesse, daer hi zijn heerlicheit hadde. Die IIII was genoemt Kenne, ende was Heykens zoen van Bennenbrueck, ende hadde zijn woenstat tot Bennenbrueck. Die V was geheten joncheer Adelbolt van Winkel, ende woende int dorp van Winkel. Daerna int jaer IIII C ende IX wert gefondeert ende gebouwet tusschen Staveren ende Medemblic een tempel, genoemt Asilum, daer alle misdadige ende verbannen luden hoir toevlucht in hadden, in manieren als Romulus binnen Romen hadde doen maken. Lange tiden hierna, als in den jare ons Heren IIII C ende XXIX, worden in Frieslant gefondeert ende gesticht bi consent ende wille der ongeloviger Friesen III cloesteren, als in Auwerden, bi Blocdijck, ende Winkel voernoemt. Int selve jaer wert oec gefondeert een cloester van witte nonnen doer bevele des conincs van Denemercken ende zijnre coninginne, die dat mit groter instancien ende beden van hem vercreech. Ende int jaer IIII C ende XLIX wert dat vrouwen cloester gesticht tot Nubexwoude; ende hoewel dese cloesteren onder den heidenen gelegen waren, nochtans leefden si als kersten menschen, na der regule van der oerden. Ende bleven dese Sassens ofte Friesen noch heidens ende in hoer ongelove wel omtrent III C jaren.