Hoe dat Lotharius coninc van Francrijck die Sassens dat sijn die Vriesen onder sine bedwanck brochte.
Dat XXX capittel.
In den jare ons Heren V C ende LXXXIX regeerde een coninc in Francrijc genoemt Lotharius die II omtrent XLIIII jaer. Dese Lotharius, als hi vele landen onder sinen bedwange gebrocht hadde, als bina heel Duytslant, is hi den Rine overgepasseert, ende is gecomen mit groter heercracht in der Neder-Sassen lant, dat nu Friesen zijn, om die mede te brengen onder sine subjectie ende onderdanicheit. Die Friesen, als cloecke ende onversaechde mannen dit vernemende, stelden hem mit alle hoer macht tegen den coninc, ende streden so vromelicken dat si die overhant ende victorie behilden. Corts hierna vergaerde die coninc weder een alten groten swaren volcke van wapenen, ende quam anderwerf in Frieslant, ende bevacht die Friesen mit groter vromicheit, ende verwan se. Ende in desen stride wert horen coninc verslagen, geheten Beroalt, ende was coninc Valckensoen, daer wi voer of gesproken hebben. Ende des conincs volc liep al Vrieslant doer, ende wat mannen si vonden die langer waren dan des conincs rijtswaert sloegen si doot. Als dit verhoerden die Slaven ofte Hollanders ende die Wilthen, gingen si in des conincs genaden. Ende dat lant mittet Sticht, dat doe mit eenre namen geheten wert Batavien oft Hollant, dat worde nu genoemt Oest-Francrijcke. Mer dese Slaven ende Wilthen en bleven daer niet langer in, dan dat die coninc weder in Francrijc was. Dese coninc Lotharius hadde in sinen bedwange alle dat lant streckende van dat Lombersche gebercht, totter groter zee toe; ende was oec die eerste die dye Vriesen ende Sassens bedwanck; ende mosten hem geven jaerlixs tribuyt.
Auteursrechtelijk beschermd