Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van coninc Daghobert van Francrijck, ende hoe hi dye Sassens ende Friesen bedwanc, ende destrueerde Wiltenburch, ende dede dat weder opbouwen ende een kercke daerin

[p. 51r]

²¹⁴ setten.
Dat XXXIIII capittel.

Daghobert, coninc Lotharijs soen, wert na sinen vader coninc van Francrijc, ende creech bi wisen rade hertoge Puppijns van Brabant lof, prijs ende eer van den volcke. Ende om wijslick te regeren nam hi tot zijnre hulpe biscop Arnout van Mets ende biscop Cunibert van Coellen. Ende den eerbaren ende wisen prince hertoge Puppijn van Landen, dien sijn vader coninc Lotharijs den eersten hertoghe van Brabant hadde ghemaect. Och hoe salich is dat lant, daer die eerbare ende wisen regeren, of daer die regenten eerbaerheit ende wijsheit soeken! Ende doer dese raetsluden voornoemt is dese coninc Daghobert tot sulker fame van justicie te doen gecomen, dat die heyden ende Slaven bi der rieviere van der Danouwe wonende alle discoorde ende twiste an desen coninc ende sine raden gebleven zijn. Mer alsoet dicwils geboert dat die princen, al zijn si goet, dat se nochtans verargert worden bi quade oerstekers ende flatteerders ende bi quaden rade, ende so worden die goede verdruct ende die quade opgetogen, ende dan volchter na vele quaets, so geboerdet van desen coninc Daghobert; want dese hertoge Puppijn, dien geleert ende van jonck bewaert²¹⁵ hadde, wert²¹⁶ voer hem also vermaert, dat hijs sien noch horen en woude; want hi hem beripst ende gestraft hadde van sine verdooltheit ende quade wercken. Mer ten lesten, bi Goeds gracie, quam coninc Daghobert tot kennnisse, ende gaf hem te bewaren sine sone Sigebert, die namaels coninc wert van Oest-Francrijcke, daerof dat Mets die hooftstat of is. Ende coninc Clodoneus, zijn broeder, sat als coninc in West-Francrijc, daer Parijs die hooftstat of is. Dese Sigebert, als hi ghedoopt wert XL dagen out wesende van Sinte Amant, biscop van Tongeren of Maestricht, so antwoerde hi mit claerre stemmen, seggende: 'Amen.' Op een tijt, als coninc Daghobert vernomen hadde dat die Slaven int lant van Duringen ingecomen waren, heeft hi veel volcs vergadert, ende quam opten Rijn, om dese Slaven te wederstaen. Dair wesende, baden hem dye Sassens, dat hi sijns vaders tribuit woude lichten, dat nochtans niet meer en was dan V C ossen tsjaers; ende indien hi dit doen wilde, so loofden hem die Sassens op horen costen die Slaven weder uuten lande te verdriven. Dwelc den coninc belieft heeft; ende die Sassens vergaerden alle horen macht, ende verdreven die Slaven weder uut Duringen. Dairna, omtrent die jaren VI C ende XLI, heeft coninc Daghobert vergadert groot volc van wapenen om te bedwingen die Neder-Sassen, dat sijn die Vriesen, ende quam ende belach dat grote slot te Wiltenburch, datwelke hi met crachte wan, ende vernieldet sere. Ende op dese stede dede hi weder maken een grote starcke veste ende stede, ende dede dye noemen in Latijn Trajectum,

214 LIII B; XXXIX A.

215 aldus C; kewaert AB.

216 schijnbaar werr; r beschadigd AB.

[p. 51v]

dats properlic in Duytsche te seggen een overveer oft overtocht, want men daer overvoer ende vertolde den castelein van Uutrecht van menigerhande comenschepe ende goeden die bi den Rijn ende der souter zee voeren. Andere segghen, ende is wel also gheloeflic, omdat Tricht opter Masen, dats Maestricht, meer te landewaert in leyt, so werdt dit gheheten Uutrecht, om dattet uutwert leyt bi der zee. Ende binnen desen montangy ende veste dede coninc Daghobert bouwen ende maken die eerste kercke in die eer van Sinte Thomas, des heyligen apostels, daer hi priesters insette, om dat heydensche volck te bekeren; mer twas al om niet, dat si arbeyden; want dit hartneckige²¹⁷ volck en wouden niet horen na den woorden der priesteren ende des heyligen kersten gheloves, ende braken die kercke te stucken, ende destrueerden se ende verdreven die priesteren uut dese stede van Uutrecht ende uut horen lande. Ende als coninc Daghobert dese stede ende plaetse weder opgetimmert ende gebouwet hadde mitten voerscreven kercke, committeerde ende beval hi den aertsbiscop van Coellen, genoemt Sinte Cunibert, dese kercke ende dit volck te regeren, stueren ende leren in den wech des salicheits ende kersten gheloves, diewelcke daer sant geleerde priesters ende clercken om dat volck te bekeren. Mer als voerseit is, twas om niet dat si deden; want die Vriesen destrueerden die kercke, ende verjaechden die priesters ende clercken. Ende togen voert in Hollant, rovende ende brandende, vanghende ende slaende dye luden ter doot, ende bisonder die tkersten gelove angenomen hadden. Ende men sal weten dat dat Sticht van Uutrecht op die tijt mede Hollant ofte Batavie gerekent was, uutgenomen Overysel; ende was een volc, eendrachtlick levende mit malcanderen, oerlogende tegen die heydensche Vriesen. Mer evenwel wast al van der nacye der Vriesen, al wast dat si bi den gelove gescheyden worden van den Vriesen, ende bleven eendrachtlick bi malcanderen, in eenre ewen ende van eenre manieren, totter tijt toe dat si van den edelen coningen van den Francken in twe nacyen gescheyden ende ghedeelt worden, als in een bisdom ende graefscap, als men na horen sal. Ende dat dese eerste kerck van Sinte Thomas binnen der stadt van Uutrecht ghefondeert ende ghesticht wert, dat was int jaer ons Heren VI C ende XLII.

217 hartneckinge AB.