Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den vromen coninc Artur van Brittangen.
Dat XXVIII capittel.

In den jare na ons Heren geboert IIII C ende LVIII regeerde in Brittangen die mogende coninc Artur XXVI jaer lanc in deuchden²¹³. Ende dese coninc Artur was in overspulle gewonnen van coninc Utherpendragon, sinen vader, bi ene hertoechinne van Cornuaelgen, geheten Igerna. Dese coninc Artur hadde die Moeder Goeds also lief, dat hij se in zijn scilt hadde doen maken, ende riep se altijt an in sijnre noot. Hi was eerbaer ende milt, ende creech so grote victorie, dat hi hem onderdanich maecte menich groot conincrijck ende lantscap, als Gallien, Almaengen, Spangen, Denemarck, Sweden, Noorwegen, Scotlant, Hyerlandt ende Vrieslant, ende voert alle die landen van der Lombersche ghebercht totter zee toe. Ende hij

213 aldus C; AB laten "deuchden" weg.

[p. 49v]

street oec tegen den Romeinen, omdat si tribuyt van hem hebben wouden. Dese coninc Artur hilt eens dat costlickste ende scoenste hof, daer yement of gehoert hadde tot Londen in der stadt, dwelcke men noemt tafelronde. Ende in desen hove stonden voer coninc Arturs tafel als hi at IIII gecroende coningen, hebbende elcxs een gouden swaert in den hant. Ende tot desen hove waren gecomen vele coningen, biscoppen, hertogen, graven, abten prelaten, coninginnen ende vele edele vrouwen ende joncfrouwen. Ende daer waren alrehande instrumenten van snaerspul, van sange ende musijke, ende alreley melodye, dat des gelijcs nye gehoert en was. Dese coninc Artur is gerekent een van die IX die beste ende vroemste ter wapen die in die werlt geweest zijn. Op een tijt als in den jare ons Heren V C ende XLII was coninc Artur in enen stride, daer hi ontfing een dootwonde; ende hi beval een zijnre suster soen, die Constantijn hiet, dat Rijck van Bertangen; ende hi liet hem voeren in een eylant genoemt Avalloen, daer hi meende te genesen, mer niement en wist waer hi voert bleef. Ende Constantijn bleef coninc van Brittangen, ende na coninc Artur so regeerden in Brittangen die een na den anderen, V coningen van Arturs' magen; ende doe quamen die Engelsce Sassens oft Friesen, ende wonnen weder dat lant van Brittangen, als men nu horen sal.