Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van coninc Aurindulius, die oec een groot casteel getimmert heeft in Hollandt.
Dat XXVII capittel.

Here Lem voerseyt hadde enen soen genoemt Aurindulius, ende was coninc van Vrieslant; denwelcken die lekeluden noemen Ezeloer, omdat hi so lange oren hadde, gelijck een ezel. Mer dit is al versierde logentael, want hi genoemt was Aurindulius of Etzelinus, ende comt sere mitten Latijn overeen; want Auris is een oer, mer dat hi lange oren hadde en is so niet. Dese coninc Aurindulius hadde oec een roesinne tot enen wive, daer hi vele kinderen an wan. Ende bisonder een scone dochter, die namaels coninginne van Vrieslant werdt. Dese Aurindulius en was niet alleen coninc van Vrieslant, mer oec van Wiltenburch ende van Hollant. Ende in desen tiden was die maniere, waer dat die coningen hoer woenstadt hilden, daer noemden si hem coningen of te wesen; aldus, die in Vrieslant sat, was genoemt coninc van Vrieslant, want alle dese landen onder enen name doe Vrieslant hieten, van denwelcken dese Aurindulius ene of was. Dese, also hi dat landt van Hollant lief hadde ende vercoren boven andere landen, om daer te wonen, dede maken ende bouwen een alten hogen ende groten casteel bi Voerburch, dat sijns gelijcs in dien tiden niet en was van hoecheyt groticheit ende starcheit, ende was genoemt coninc Aurindulius' slot; daerna bouwede hi noch een slot an die noortside van der wildernisse, vast bi Noortwijck. Ende dese II sloten stonden totten tiden dat die Denen ende Noermans quamen, ende tlant mitten stichte van Uutrecht destrueerden ende verwoesten. Ende alsdoe worden dese sloten mede gedestrueert ende ter nedergeworpen, als na geseyt sal worden. Lange tijden hierna, als in den jare M V C ende daeromtrent, wert dat fondament van desen groten castele tot Voerburch opgebroken, ende die sten uutgehaelt, daer menige vreemdicheden gevonden werden, als goude, silvere ende metale penningen, daer ick een of hebbe, mit een aensicht op deen sijde; ende dat opscrijft hout, dat hem keyser Nero geslagen heeft, ende noch ene dye keyser Anthoninus Pius geslagen heeft, elck mit enen afgod an dander side. Dese coninc Aurindulius leefde sere lange, ende hadde vele kinderen, ende enen soen genoemt Falck. Ende dese fondeerde ende bouwede oec een starck casteel an die noortside van der wildernissen, vast bi den Rine, ende noemde dat na hemselven Valkenburch, daer noch dat fondament of leyt onder die aerde an die westsijde van der kercke.