Hoe dat die keyser Valentiniaen overwan die Wilthen, Hollanders ende Vriesen, ende destrueerde dat grote casteel tot Wiltenburch.
Dat XXIII capittel.
In den jare na ons Heren geboort CCC ende LXX of daeromtrent, maecten die Wilthen, dat sijn nu Stichtse, ende die Slaven, dat sijn nu Hollanders, ende die Neder-Sassens, dat sijn nu Vriesen, een aliaence ende overdracht mit malcander, ende vergaerden een alten groten hope volcs, ende ghingen te scepe omme den Rijn op te varen, ende mit heercracht te anvechten ende destrueren alle tWalsche landt ende Hoech-Duytslant, als si deden. Ende togen den Rijn op, doende grote scade van roven ende branden, slaende ende dodende al dat si crigen konden. Die keyser Valentiniaen dit vernemende, heeft groot volc van wapenen vergadert, om dit verwoede ende wrede volc te wederstaen, ende heeft enen groten swaren strijt tegen dit onstuere volc gehadt, ende verwan se. Ende hi nam hoer scepen, ende voer den Rijn neder, ende destrueerde ende verwoeste, werpende ter neder hoer grote ende starcke casteel tot Wiltenburch, ende bedwanc dese luden ende Vriesen, dat si tot sinen geboden mosten staen. Ende also dit lant van der Neder-Sassens een kout lant was, soe noemdent die Romeynen Vrieslant; nochtans seggen enige historijscrivers, als Plinius die Anderde, dat dit lant van den Neder-Sassen lange tijt voer desen keyser Valentiniaen Vrieslant genoemt was.
Auteursrechtelijk beschermd