Hoe dat die Slaven ende Wilthen mit crachten wonnen Anthonia, ende timmerden weder een groot, starck slot opter selver stede, dat si deden hieten Wiltenburch.
Dat XIX capittel.
Daerna, in den jare ons Heren C ende LXXXVI, overmits der menschen sonden, die God an hem wreken wilde, quam menigerhande volck uut Barbarien mit groter heercracht, ende verwoesten ende vernielden meest alle Europen; als die Gippides wonnen Ytalien; Alani, Oestenrijc; Sarmati, Hongerien; Wandali, Affriken; Ghoti, Cathalongen; Huni, Walslant. Ende die Slaven ende Wilthen, die in Zuyt-Hollant woonden, staken hem te samen mit groter macht, ende quamen, ende beleyden die veste ende fortresse Anthonia, ende wonnent mit crachte, ende sloegent al doot dat si binnen der mueren vonden, ende ten lesten worpen si dat casteel ende veste mitter mueren ter neerGa naar voetnoot188 ende destrueerdent ter aerden toe. Ende als si horen bosen wille hadden volbracht, een wijl tijts daerna, timmerden si dat casteel weder op, ende maecten daer een ander veste ende starcte mit mueren ende poerten, ende deden dat na hemselven hieten Wiltenburch. Ende van desen Wilthen bleven dair een deel wonen, ende begeerden niet dan alle onvrede ende oerloge; ende lieten nyemant met vreden omtrent hem sitten. Ende vermenichden seer, ende deden veel quaets omtrent hem ende in anderen landen, ter tijt, dat si van den mogenden keyser Valentiniaen verwonnen worden, ende Wiltenburch ten gronde gedestrueert wert.
Nu wil ic hier weder opsetten, alsoe ick voerseyt hebbe, den paeus Silvester, voertghaende totten paeus Sergius die eerste van dyer namen, die welcke paeus Sergius consacreerde ende wijde den heiligen man Willebrordum tot enen aertschen bisschop van Uutrecht. Ende nae den paeusen wil ick opsetten den keyser Constantijn die Grote, vervolgende totten keyser Justiniaen, die by Sergius, des paeus tiden, dat Roomsche Rijck regerende was. Ende wil dan die historye continueren van Wiltenburch, ende wat in desen tijden gheschiede als binnen den termijn van omtrent IIII C jaren.
Auteursrechtelijk beschermd