Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Anthonius ende Granus, twe edele Romeinen, uut Romen verdreven worden, ende in dese Nederlanden quamen.
Dat XVIII capittel.

Hiervoer heb ick gheseit, hoe dat Nero dat Roomsche Rijck regerende was als keyser, omtrent XIIII jaer, ende wat hi binnen sinen leven bedreven heeft. Hoe dat hi die eerste persecucie dede opten kerstenen, ende dode die II Princen der Apostelen, Sinte Pieter ende Sinte Pouwels, ende op tcorste¹⁸⁷, hi hatede alle goede menschen die duechtlic levende waren. Ende als hi van yemant gestraft wert van sijnre wreetheit ende tyrannicheit, dien liet hi mit enen smadelicken doot sterven. Andere verdreef hi ende verjaechde se sonder recht of reden uuter stadt. Onder diewelke dat waren II edele Romeinen, daer die ene of hete Granus, ende dander Anthonius van der Columnen oft van Zulen. Granus was een van den edelen senatoren, ende Anthonis was een trybuyn oft ridtmeester. Granus is mit sinen volcke ende geselscap gecomen doer Walslant, hebbende mit hem grote scat ende gelt, ende quam in Ardennen, daer hi vant fonteinen van svavelic water. Ende daer fondeerde ende stichte hi een fortresse ende starcte, ende dede dat na hemselven noemen Aquagrani, dat

187 s beschadigd AB.

[p. 36v]

is nu Aken. Anthonius quam mit sinen ghesinne ende geselscappe doer Germanien ende Vranckenlant, dat is Duytslant, ende quam int lant van Batavien, dat is nu Hollandt, ende begreep daer een plaetse opten stroom van den Rijn. Ende began daer oeck een veste ende toorne te maken, vast ende starck, ende dede die na hem hieten Anthonia. Ende dit was int jaer na ons Heren geboerte LXV. Ende Anthonis mit sine nacomers besaten desen burch ende veste C ende XXI jaer, totdat die Slaven ende die Wilthen quamen, ende verdestrueerden desen toorne ende veste. Sommige willen seggen, dat dese Anthonis dede oec maken die grote stadt geheten Duersteden, dat is nu Wijck te Duersteden, hoewel dat enige andere seggen, dat Battus of Batavus, een prinche der Catthen, dese stadt gemaec soude hebben; ende dede se na hem hieten Batavodure, als ick hiervoer gescreven hebbe; mer wat hier van is, bevele ic den gheleerden ende experten historijscrivers. Noch dede dese Antonis maken dat slot te Anholt, dat Zulen plach te heten. Ende van desen Anthonis zijn gedescendeert ende gecomen int Sticht van Uutrecht die ridderen ende heren van Zulen.