Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Sicambri, dat sijn Ghelreschen, veel lants verdorven, ende hoe se Marcus Agrippa bedwanck.
Dat XII capittel.

Als Tiberius ende Nero weder te Romen waren ghecomen, soe sijn die Sicambri, als Strabo scrijft, opghestaen, ende overvielen mit roef ende brant dat volck ghenoemt Ubij, ende dat was dat volck, als sommighe segghen, dat die landen bewoenden daer nu die stadt van Coellen staet, ende die daer omtrent leggen. Sicambri is dat volck dat daer woent in den landen gheleghen tusschen den Rijn ende die Maese, ende is nu¹⁵³ tlant van Ghelre. Als nu dese Sicambri begonnen dat volck Ubij mit roef ende mit brant te overvallen ende dat lant te verwoesten, soe senden die Ubij uut twee eerbare mannen, dye ene gheheten Policarpus, dander Drusillus, totten keyser Octaviaen om hulpe ende bystant. Terstont sandt dye keyser enen vroemen raetsman ghenoemt Marcus Agrippa, een vroem cappeteyn, mit drie legionen, om dit volck weder te staen, ende den anderen, als die Ubij, te helpen ende te bescermen, dwelcke hi ghedaen heeft. Ende verwan se, verslaende veel volcx, ende maecte se den Roomschen Rijcke onderdanich. Ende alsdoen vergaerde Marcus Agrippa alle dat volck, dat daer omtrent woende, in dorpen ende andere woningen. Ende timmerde ende dede maken enen stadt, ende hiet se na hem selven Agrippina¹⁵⁴, ende noch wel III C jaer hierna; mer na wert si geheten Colonia, dats Coellen. Van deser

153 uu (schijnbaar) AB.

154 agrippiva (schijnbaar) AB.

[p. 26v]

Heilige Stadt van Coellen vint men vele ghescreven in der Croniken van Coellen, mer want si niet en dienen tot onser materien, soe laet ic die after om der cortheit willen.