Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Octavianus na Julius sinen oem die anderde keyser van Romen wert.
Dat X capittel.

Octavianus van Rome, die anderde keyser; den toenaem Cesar of Keyser hadde hi van sijn oems wegen, Julius. Oec wert hi genoemt Augustus, dat is Vermeerder des rijcx, welken tytel alle andere keiseren na hem mede scriven. Sijn vader was geheten Octavius van den Romeinen, mer van de Duytschen wert hi genoemt Carolus. Zijn moeder was genoemt Accia, ende was gecomen van coninc Eneas, die Romen eerst begreep, als voer geseyt is, van den geslachte Julia, des eersten keyser Julius' suster. Ende gaf se te manne een groot prince van Neder-Duytslant, Octavius voornoemt, of Carolus, ende si wan bi desen man een soen ende twee dochteren. Die soen hiet Octavianus, die wi hier nu als keyser van Romen opsetten. Die een dochter hiete Actia, na hoer moeder, die ander dochter hiete Octaviana, dien hoer broeder Octavianus uut gaf an

[p. 25r]

den coninck van Nijemaghen, die Brabon ghenoemt was, daer si enen soen an wan, ghenoemt Kaerl, die XC jaer in groter mogentheit regneerde ende hadde ontfangen vele provincien ende landen onder sine jurisdictie van sinen oem Octavianus, keyser van Romen, als die Croniken van Brabant dat breder uutwisen ende bescriven. Dese Octavianus quam jonck tot sinen oem Julius, die eerste keyser, ende die toech hem op voer sinen sone, ende maecte hem een erfgenaem sijns goets. Hi was een gelert man, ende seer wel sprekende. Ende al was hi een keyser ende gebieder der gansser werlt, nochtans so woude hi dat sijn kinder hantwerck of ambochten leerden, ende sonderlinge dat die sonen hem oeffenden in ridderlicke feyten van wapenen. Sine dochteren dede hi leren wollen, spinnen ende weven, ende dat dede hi daerom: oft bi avonturen ghesciede, dat si arm ende behoeftich worden, dat si hem dan mochten gheneren mit horen arbeyt.