Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den oerspronck ende beginsel des eylants van Walcheren in Zeelant.
Dat XXIIII capittel.

Als die stadt van Romen ghestaen hadde omtrent twee hondert ende XXIIII jaer, ende in den tijden dat die heylige vrouwe ende wedue Judith leefde, regneerde ende hadde heerscappie in der Belgiers landen, ende was in den lande van Henegouwen, daer nu die stede van Bergen staet, daer nu een dorp of ghebleven is, ghenoemt Belgies, ende omtrent, een prince ghenoemt Leo; ende als hi ghestorven was, koren die Belgiers enen anderen hertoghe, ghenoemt Walachrijn. Dese, als

[p. 19v]

hi anghenomen was tot enen hertoghe ende prince, heeft terstont alle dat van edelen gheslachte was uuten landen verdreven ende ghebannen, uutgheseyt allene die priesteren. Ende vele van den edelen, die sine tijranscap niet verdraghen noch liden en wouden, sijn uuten landen ghetoghen, ende sijn vergadert in die groote stadt van Blandine in Vlaenderen, die sommighe willen seggen dat nu Ghent is. Ende maecten dese stede starck, om hem daer inne te bescermen voer allen ongevalle ende crachten; ende dese stichten ende fondeerden oec die stede van Nervien, die men nu Doernick hyet. Dese Walachryn opstelde nijewe wetten ende manieren, ende alle dat die coninghen ende heren ordineert ende gheset hadden, casseerde ende maecte hi te niet; ende heeft der goden tempelen gespolieert ende¹³³ beroeft van cleinoden ende chijerheden, ende heefter sine wiven mede verchijert. Ende die thijnspenningen ende tributen toebehorende den goden heeft hi tot sijnre oerber ghehouden, ende heeft ten lesten uut groter hoemoet ende vermetelheit die priesterlicke officie anghenomen, doende sacrificie voer den god Baal oft Beel, van denwelcken die overste priester des tempels hem straffende, heeft hi hem willen doen dootslaen voer alle den volcke. Dat volck dit siende, sijn teghen hem opghestaen ende een oploop ghemaect, ende verdreven hem mit alle sine familie ende dienres uuter stadt, verslaende oec vele van den sinen. Binnen drie daghen daerna is hi weder ghecomen mit groot volck van wapenen, omme die stadt te winnen; mer die binnen quamen soe crachtlicken ende in soe groter menichten uuter stadt, ende hebben hem ghejaecht ende ghedreven tot opten oever van der zee. Walachryn siende dat hi tegens dit volck niet houden en mochte, is mit alle sine knechten ende volck tscepen gheghaen, ende is die zee gepasseert, ende quam in een eylant dat wilt ende ombewoent was, ghelegen onder die eylanden van Zeelant, ende heeft dat bedyct ende starck ghemaect mit hoge wallen ende dijken voer den opvloyen des zeewaters, ende heeftet na sinen name genoemt Walachria, dats Walcheren. Ende heeft dit eylant lange tijt mit sine nacomelinghen beseten, van denwelcken die hertoghen van Walcheren ghecomen ende gesproten sijn, als Hugo Floriacensis in sine croniken¹³⁴ van Lotringe bescrivet. Ende in dit eylant wert namaels fondeert ende ghesticht van Salando (daer Zeelant of ghenoemt is) die stede van Mitelburch, ende van Ziringo Zyrixzee, als ick voer in der descriptie van Hollant ende Zeelant gheseyt hebbe.

133 eñde AB.

134 cornikeu AB.