Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Sicambrinen bestreden worden van desen Slaven omtrent die eylanden van Zeelant en hoe dat Dordrecht ghesticht wert.
Dat XXII capittel.

Als nu die Slaven groot ende machtich van volcke gheworden waren, ende hem ghedeelt hadden ende ghespreit in den landen daer omtrent, soe ist geboert omtrent C jaren nadat si tlant bewoent ende beseten hadden, dat die Sicambrinen quamen, dat was tvolck wonende omtrent die marasschen van Meothides, ghelegen boven Hongerien, bi die Schyten, ende waren Troyanen aldaer gecomen mit horen vromen cappeteyn Francion, Hectoers soen, ende hadden daer een plaetse begrepen daer si een stadt ghetimmert ende fondeert hadden, gheheten Sicambrien; waerof dat si hieten Sicambrinen. Dese hebben hem te samen starck ghemaect ende sijn tscepe gegaen om te becrachtighen dat eylant van Britannien, dat nu Enghelant hiet, ende dat te besitten. Ende comende opter zee worden si overmits grote winden ende stormen conquasseert ende verdiliget, dat si tegen horen wille ende dancke gheworpen worden an die custen ende eylanden van Zeelant, dat doe noch onbewoent was. Dit vernemende die Slaven, meenden dat si ghecomen waren om hoer lant te destrueeren, ende hemluden daeruut te verdriven, vergaerden terstont alle die scepen die si crighen mochten ende bi hem hadden, ende maecten hem starck van volcke, ende toghen mit alle hoer macht om dese Sicambrinen te bevechten. Die Sicambrinen stelden hem vromelick ter weer, ende daer gheviel een grote strijt, soe datter veel an beiden siden gheslaghen worden, mer alder meest van den Sicambrinen; ende verdreven se uut horen palen ende landen weder ter zeewert in, ende namen enen groten roof mit hem, ende togen weder mit groten zeghe ende victorie na Slavenburch, ende sloegen hem daer weder ter neder, ghenerende hem ter zeewert mit vischen ende te lantwert mit jagen, ende wonnen veel kindren, ende vermenichvouden seer. Ende was een wilt ende ruych volck, groot van statuere ende live, als wilde luden, ende en vreesden nyemant ter werlt. Ende als si aldus sere vermenichvoudichden, ende hem dat lant te cleine viel, soe togen si een deel over die Maes int lant daer nu Dordrecht staet, ende begrepen dat ende bewoendent; ende dese hieten Wilten. Een deel toghen in die eylanden van Zeelant, ende begrepen dat, want daer noch nyement en woende; onder diewelcke dat ene was genoemt Zyringus oft Zyrick. Dese fondeerde ende stichte die stede van Zyricxzee. Ende dit volc geneerde hem mit visschen ende roven opter zee, waerom dat si Zeelanders geheten worden. Ende di Wilten, die in Zuyt-Hol-

[p. 18r]

lant woenden, geneerden hem mit copen, scapen, paerden, ende vermenichden oec seer ende worden seer starck¹²⁷ van volck van wapenen. Onder die welcke datter ene was, mer lange jaren hierna, geheten Dorech. Ende dese stichte ende fondeerde een stede ofte veste. Ende dede se na hem selven heten Dorechts Drecht, die wi nu noemen Dordrecht, ende is bi lancheden van tijden een vermaerde coopstadt gheworden, ommedat si te lande ende te water wel gheleghen was; want alle die scepen die riviere van den Rijn ende Mase nedercomende, mosten daer verbi ter zeewert inne. Lange tijden hierna, ende dat landt totten Heilighen Kersten ghelove bekeert ende ghebrocht wesende, woonde binnen der stede van Dordrecht een eerbare maget, genoemt in Latijn Sotheris, mer in Duytsche Zuwaert; dese stichte ende fondeerde die eerste kercke aldaer, mit alleen drie pennigen, die si in haer budel hadde. Ende hoe dicwils dat si die uut gaf, altijt waren si weder in haer budel, waeruut dat die werckluden vermoeden dat si veel ghelts hadde ghehadt, omdat si soe costelijcken werck timmerde ende maecte; ende hebben se op een tijt ghewacht, ende die kele of ghesteken. Ende op die stede ontspranck een scone fonteine. Ende als si niet meer dan dese drie pennigen bi hoer en vonden, waren si seer droevich, ende beroude hem seer dese moort, ende was hem seer leet. Ende die moordeners worden ghevanghen ende ter justicie gheset. Ende als men se rechten soude, ontspronck dese maecht van der doot, als van enen sware slapen, ende verloste dese drie mannen, ende brocht se tot Romen. Ende aldaer spraken si haer biechte mit groten berouwe van der misdaet. Ende als die paeus dit mirakel hoorde, ende sach den snede ende tlitteken in horen hals als een roden siden draet, gaf hi dese maget grote indulgencien ende oflaten, omme die kercke van Dordrecht voert op te timmeren. Dwelck si dede. Ten lesten is si salichlijc gestorven. Mer hoe oft wanneer dat dit ghesciede, en weet men geen besceit of, dan dat men dagelicx noch siet binnen der stede die voerscreven fonteine.

127 strack AB.