Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die gyganten ende ruesen van Brutus uut Brittangen verdreven Hollant eerst begrepen, ende hoe si dat grote ende starcke slot tot Slavenburch bi Vlaerdingen¹²⁶ maecten.
Dat XXI capittel.

Hiervoer heb ic ghescreven, hoe dat Brittus ende Corineus sijn geselle Troyanen int eylant van Albion quamen, ende daerinne vonden vele grote gyganten ende ruesen, die, als sommige croniken willen seggen, gecomen waren uut Assyrien, ende hadden dat eylant Albion ghenoemt, na die witte blinckende bergen Albiona, dat welcke Brittus, als hi dat bedwongen ende becrachticht hadde, na hemselven dede hieten Britangen. Die ruesen ende gyganten siende dat si tegen Brittus ende sinen ghesellen ende Troyanen niet houden en mochten, ende dat si van sinen gheselle Corineus verwonnen worden ende vermoort, worden si te rade dat eylant te begeven ende te laten, ende nijewe landen ende plaetsen soeken daer si hem ter neder mochten slaen. Ende sijn tscepe ghegaen mit wiven ende kynderen, ende quamen ghezeilt an der Neder-Zassen lant, dat nu Oest-Vrieslant is. Ende als si meenden dit wilde lant, dat doe niet seer noch bewoent ende betimmert was, te begripen ende te bewonen, ende int lant ghegaen waren omme bequame plaetsen te begripen, siet, terstont vernamen dit die wilde Neder-Sassens, ende bereyden hem mit groten hopen ende menichte omme dese gyganten ende ruesen te bevechten, ende sloegender hem enen groten hoop of. Die andere, dit siende, liepen weder tscepe, ende toghen weder ter zeewert in, ende zeylden westwert op, om te soeken enige rivieren oft havenen daer si hem nederslaen mochten. Ende quamen ten lesten ghezeylt omtrent die mondt van der Masen, daer die Mase in die zee coemt. Ende ghingen daer op dat lant,

126 Vlaerdigen AB.

[p. 17v]

ende begrepen aldaer die plaetse, ende sloegen hem neder, ende bleven daer lange tijt wonen in tenten ende hutten van hout ende rysen ghemaect. Ten lesten begrepen si een plaetse daer si een fortresse ende veste timmerden ende maecten voer den overvalle hore vianden, wanttet na der zee was, dwelcke groot ende swaer was, ende hietent Slavenburch, nae hemselven, want si Slaven hieten. Ende dit was omtrent Vlaerdinghen ( niet dat nu Vlaerdinghen is; want dat oude Vlaerdingen ende Slavenburch nu verde in die Mase ofghespoelt ende verdroncken leggen. Ende dit casteel hadde an die oestside belegen dat grote lange wout ende wildernisse (streckende van Doernick of totten Rijn) dat na menige jaren hierna van Claudius die keiser genoemt wert tWout sonder ghenaden, ende dit was IX C jaren voer Goods gheboerte, ende was in den tijden dat Samuel die propheet rechter van den kinderen van Ysrahel was. Ende dese Slaven hijlicten daerna veel an die wilde Neder-Sassen oft Vriesen; ende des volcx wort veel ende menichvoudich; ende si deelden hem, ende togen een deel van desen volcke over zuytwert op, ende begrepen daer hoer plaetse, ende bewoenden eens deels tlant dat nu Zuyt-Hollant hiet. Ende dit volck hieten voertan die Wilten.