Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Hollanders altijt vrij sijn gheweest ende altijt sonder exactien, scattingen, thijns ende tribuit gheseten hebben.
Dat XVI capittel.

Omdat dan die Hollanders alsoe trou ende dienstich waren den Romeinen, soe bleven si vrij, ende saten sonder enige thijns, scattinge oft tribuit te geven, mer plagen alleen den Romeinen mitten lichaem ende wapenen te dienen op des keisers cost. Ende soe wanneer enige heervaert anstont, ende die Romeinen hulp begeerden, so screven si: Coemt ghi Walen, Bertoenen, Duysschen, tot onsen dienst, ende ghi sult aldus veel oft alsoe veel hebben voer uwen soudije ende zalarijs. Mer scrivende totten Hollanders en estimeerden si dat loon niet, want si gaven hem alsoe vele als si eysschende waren. Dit betuget oeck Marcialis, des keisers Domiciaens cokenmeester, een groot poeet, als dat die Romeinen den Hollanders niet alleen en eerden, mer oeck ontsagen; want doe een burger van Romen een groot huis op een hoeck van een-

[p. 13r]

re straten ghetimmert hadde, dede hi setten een beelt van stenen uutghehouwen opten hoeck van den ghevel, mit een faetsoen van enen Hollander, mit alsulcken habijt als si doe in Hollant plegen te dragen. Die kinderen van Romen quamen om dit beelt te besien ende bespottent, overmits die nijewicheit van den clederen ende habijte. Dit horende Marcialis voornoemt, maecte twe metren oft vaersen ende ghedichten over dit beelt, ludende aldus: Ghi kinderen van Romen bespot mi, mer Domiciaen die keiser ontsiet mi.