Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van die vromicheit der Hollanderen uuten gesten van Romen.
Dat XV capittel.

Die oude Roomsche croniken ende gesten die van den historiographen als Cornelius Tacitus, Suetonius ende Orosius bescreven zijn, houden in ende begripen dat boven alle nacien van Duytslant die Bataviers oft Hollanders mitten sinen altijt die starckste mannen, vroom van wapen ende snel, clouck, wacker ende lancmoedich in alle hoer wercken waren, als die keiseren Otto, Galba ende Vitellius wel ondersocht hebben, de si den Hollanders mit Kenemers

[p. 12v]

in horen dienst ende heervaert hadden. Si wisten wel, dat Gajus Caligula, Nerois oom, keiser (die thuis te Britten, voer Catwijc opter Zee, tot een vuerbaeck om in Brittanien totten Britten of den Engelsen te zeylen, ghesticht hevet) hadde altijt die Hollanders bi hem als sijn archiers ende bescermers sijns lijfs. Dese keiser Gajus, noch die keiser Claudius, en wouden Engelant niet bevechten sonder die Hollanders. Want Julius Cesar, die eerste Roomsche keiser, hadder qualicken gheweest, want hi hadder alle sine gheridt van paerden ende tmeeste deel van sijn voetknechten mit sijn scepen ghelaten, als ghi onder die gesten van Julius noch horen sult. Ende oec alser onderling partije was onder den keiseren ende Romeinen, soe wisten si sekerlick dat die te boven gaen ende triumpheren soude, dien die Hollanders adhereerden ende te hulpe quamen, als keiser Vitellius dede doen hi tegen keiser Ottho striden soude, want Varenus Alphenus van Alphen is mitten Hollanderen anghetreden, ende versloegen al Otthen volck, ende verjaechden se, waerom dat die Hollanders int voertganck des tijts alsoe doersocht ende exerciteert waren in wapenen, dat se hem lieten duncken, dattet in hore handen ende macht¹⁰⁹ was enen keiser van Romen te maken ende te ontmaken. Ende in der waerheit, soe was sekerlick alsoe! Want op een tijt doe dat heer van den Hollanders hem vermaten, dat si veel meer dan enige andere nacien¹¹⁰ (die oec mede onder die van Romen dienden) ghedaen hadden, als dat van hem die XIIII legioen ter neder ghetogen, ende bina heel Italien den keiser Nero, doer hoer cloucheit ontogen was, ende seiden, dat alle die fortune des strijts in horen handen ende macht gheset ende gestelt was. Of si seggen wilden: wie mit ons toeleit ende anvalt, die heeftet gewonnen. Soe was dit den anderen cappiteinen ende knechten van andere nacien lastich ende swaer te horen, waerom dat Flaccus Valens, die overste capetein van tgemeen heer, voer hem nam dat hi den Hollanders, die so stoutelick spraken, vaneen woude sceiden. Doe dit vernomen¹¹¹ was onder dat Roomsche heer, begonnen si te murmureren; die legionen worden verwoet, dat men hem den hulp ende onderstant der alre starckster mannen der Hollanderen benemen ende ontrecken woude, die tot allen periculen ende noden stout waren, die III C vroom¹¹² te paerde waren, die mit hem XXX of XL mit hoer paerden te vollen harnasse alle rivieren ende wateren conden overswemmen, die soe menichmael victorie gecregen hadden, die soe exerciteert ende besocht in vele striden ende oerlogen waren, dat men hem die nu ontrecken ende van hem wilde verdriven, daer die vianden soe nabi hem waren. Hadde hi Romen lief¹¹³, dat hi doch die alre vroomste ende¹¹⁴ cloucste leden als die Hollanders niet versceiden noch ofsniden en wilde van den lichame, dats van den Roomschen Rijke. Aldus spraken die Romeinen totten oversten cappetein Flaccus Valens voernoemt. Waeruut men mercken mach, dat die Bataviers oft Hollanders altijt voervechters des Roomschen Rijcks sijn gheweest.

109 Aldus A; mach B.

110 Aldus A; nacie B.

111 Aldus A; vernamen B.

112 Aldus A; vrom B.

113 Aldus A; lieft B.

114 oñ AB.