Hoe dat men oec Hollant ende Zeelant vint in anderen landen ende nacien.
Dat XIIII capitel.
Oft iemant die veel ghelesen heeft oft bevonden in ouden gesten ende croniken seggen woude, dat Hollant ende Zeelant oec leggen in anderen nacien ende provincien. Tis waer, datter int coninckrijck van Noerwegen een plecke lants leit, dat men Hallandia noemt, mer niet Hollant, ende in der zee daerbi, die men hiet Baltheum of die Duytsche Zee, leit een eilant ghenoemt Zialandia, welcke namen bina mitten onsen, daer wi hierof spreken, in der vocabulen overeencomen; mer sijn nochtans veer versceiden in sprake, forme, lichame, zeden, manieren ende van habite van ons Hollanders ende Zeelanders, hoewel dat wi nochtans eens deels gecomen sijn van henluyden, of daeromtrent. Ende te bat mach men tgheloven dattet aldus in der waerheit is, want die kinderen ende nasaten, als si haer plaetsen verwandelen of vernijewen, houden si gaerne die namen der landen, steden ende sloten daer hoer ouders ende voersaten plegen te wonen, als bisonder die princen ende burgeren verdreven uut Troyen gedaen hebben, tot een ewige memorie. Want daer en is nauwe een lantscap, men vinter Troyen in gesticht. Diergelijc vint men Vienne in Oestenrijck, ende Vienne in Dalphinoys; ende Hage in Hollant, ende Hage in Vrieslant. Aldus en ist niet vreemt, dat dicwils versceideGa naar voetnoot108 landen ende steden enen name hebben.
Auteursrechtelijk beschermd