Een artikel van Hollant.
Dat X capitel.
Hollant (voermaels Batavia genoemt, als voerscreven is) is een provincie in Neder-Duytslant, dwelcke ant noorden van die Grote Zee bevloiet wert; an die ander siden wertet becingelt mitten armen des Rijns, ende maken een eylant. Dit lant is seer overvloedich van weiden ende velden, om paerden, coyen, ossen, scapen ende andere beesten te voeden, ende heeft in hem vele poellen, marasschen, meeren ende staende wateren, die nu mit slusen in der zee, mitter ebbe, gheleydet worden. Die forme ende ghedaente der mannen ende vrouwen van desen provincie is scoon, ende uutmutende boven andere nacien, ende tvolck is starck ende reisich van statuer ende lichaem; hoer dranck (wantter gheen wijngaert overvloedich en wast) is bier, dat is een confectie gemaect van mout, als haver, gherst, rogge ende tarwe tesamen wel ghesoden. Ende van dit eylant is Uutrecht die hooftstadt int gheestelick. Annonius, een historijscriver der Franssen, scrijft in sijn cronike, dwelc Plinius Secundus oec betuget, aldus: dat tusschen den armen van den Rijn ende die zee leggen C eylanden, onder welcke dat eylant Batavia dat edelste, beste ende vroomste is van mannen.
Auteursrechtelijk beschermd