Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die gantse werlt van Noe ende sijn III kinderen mit menschen vervolt is, ende wat elck tot sinen dele ende erve ghenomen heeft.
Dat IIII capittel.

Hier is te weten dat Noe in sijn leven sinen III sonen, Sem, Cham ende Japhet, als een gheweldige keiser ende here der gansser werlt (die in III delen ghedeelt is, als Asien, Affriken ende Europen) gheordineert ende bestelt heeft, dat een ijgelick een deel als voer zijn vaderlick erve besitten ende hebben soude; van welcke III delen elc deel in veel landen ende provincien ghedeelt is. Nu hebben een ijgelick van desen III sonen veel kinderen ghehadt, van welcken kinderen oec grote gheslachten ghecomen zijn. Soe heeft dan een ijgelick van den III sonen zijn deel erves inghenomen, mit sinen

[p. 4r]

gheslachten, ende hebben⁴¹ alsoe die gansse werlt besettet mit volck, ende den landen ende provincien namen ingeset. Ende nadat si vermenichvoudicht werden in veelheit des volcxs ende der personen, daerna hebben si hem verstroyet in allen landen, ende die begrepen ende woenachtich ghemaect. Item. Boven desen III sonen heeft Noe ghehadt noch enen soen, ghenoemt Jonychus, als Methodius scrijft, ende Vincencius in Den Spiegel Historiael, ende ghemeenlick alle historie scrivers. Ende was sijn eerste gheboren soen, als Methodius scrijft. Mer Moyses en noemt hem niet in der Bibelen, want daer en worden niet meer dan VIII menschen salveert in der diluvien, als voer ghescreven staet. Aldus, had hi Noes outste soen geweest, soe most hi mede in der arken gheweest hebben, oft hi most verdroncken hebben gheweest. Mer Jacobus Philippi, van Sinte Augustinus Oerde, scrijft in sijn cronike, dat Noe heeft gewonnen sinen vierden soen na der diluvien, ende was ghenoemt Jonichus. Ende was een cloecksinnich man, ende een groot astronimus, ende was die eerste die die ghelegentheit ende naturen der sterren angemerct hevet. Overmits sine konst bekende hi dat opcomen ende beginsel der IIII principael rijken, ende oec horen onderganck ende destructie. Desen gaf die vader gheen deel mit sinen broederen, mer hi gaf hem grote ghiften ende gaven. Ende hi toech in een lant genoemt Ethan, ende gewan daer kinder bi sinen wive, ende vermenichvoudichde sere, ende was des selven volckes here; ende bouwede daer een stadt, die noemde hi na hem selven Jonicha. Item. Noch scriven een deel historijscrivers sommiger landen om lof ende ere hoers geslachtes uut outheden der tijden, van anderen sonen die Noe ghehadt heeft. Ende van denselven scriven si, dat si daerof ghecomen sijn, ende hebben hoer landen eerst begrepen als sijn die Beemers ende andere. Item. Die scriver der historien ende croniken van Zassen, die climpt op in die vertellinge der selver ofcompst tot op enen soen van Noe, die in der arken gheboren is gheweest, ghenoemt Scrophius. Item. Een ander scriver der historien van den Romeinen, ghenoemt Escondius, die scrijft, dat Noe noch een soen heeft gehadt, genoemt Janus, daer si of gecomen soude wesen; daer die berch noch binnen Romen legghende, Janiculus, sinen naem of heeft. Mer wat hier van dese nageboren Noes soen sij, bevele ic den gheleerden; want elcke nacie ende gheslachte begeert die outste haercoemst te hebben.

41 aldus A; hobben B.