Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die diluvie quam, ende de werlt mitten water verghing, ende hoe dat van Noe III sonen alle dat menschelicke gheslacht gecomen is.
Dat III capittel.

Als die werlt gestaen hadde II M II C ende XLII jaer, als Sinte Jheronimus scrijft, soe heeft God overmits der menschen menichvoudigen sonden die werlt willen plagen ende doen vergaen mitten water. Noe, Lamechs soen, die IX van Adams geslachte, een rechtverdich man, sachtmoedich ende barmhertich, heeft ghenade gevonden bi God den Here. Ende als hi out was V C jaer, gewan hi III sonen, als Sem, Cham ende Japhet. Ende in desen tijden waren die ghedachten der menschen anders niet, tot aller tijt, dan tot sonden. Mer Noe was een goet Godfruchtich man, ende was altijt daerom uut, mit leringe, mit vermaninge, mit prediken, dat hi dat volck bekeren mochte. Ende want hi niet en bedreef, noch en vorderde, ende besorcht was dat si hem sine huysvrouwe³⁸ ende sinen kinderen verslaen ende doden mochten, soe vloot hij uuten selven lande. Ende als hi wech ghetoghen was, sprack God tot hem: 'Het rouwet Mi, dat Ic den menschen gemaect ende gescapen hebbe; Ic wil se verdiligen ende doen vergaen mitten water.' Ende God geboet hem dat hi een scip maken soude, ende seide hem die ghesteltnis des scips, hoe hi dat maken soude van lancheit ende hoecheit, ende van ondersceit der cameren des scips, daerinne die dieren ende beesten die levendich bli-

38 aldus A; hyusvrowe B.

[p. 3v]

ven souden, behouden souden worden. Noe bestont dat scip te maken, ende bouwede daerover C jaren; ende³⁹ binnen desen tijden gaf God den sondigen menschen dat si hem beteren souden ende penitencie deden. In welcke tijt Noe dagelicxs die menschen riep tot penitentie ende beteringe, mer si worden hoe langer hoe arger. Doe nu die C jaer omme ghecomen waren, ende die arcke bereit was, doe was Noe VI C jaer out; soe nam hi mit hem in die arcke vitaelge ende noottrufticheit van spise, ende nam mit hem van allen dieren ende beesten der gheslachten, die behouden souden werden, van elx een manneken ende een wijfken. Oec ghinc hi mit sine huysvrouwe, mit sine III sonen ende hoer huysvrouwen, dat waren VIII personen, in die arcke. Doe Noe mitten sinen, ende allen dieren ende beesten, die van God daertoe bestelt waren, in der arcken waren, doe begant te regenen; ende regende XL dagen ende XL nachten. Ende die wateren worden wassende, ende voerden die arcke XV cubitus oft ellenbogen hoech boven alle gheberchten, hoe hoech si oec waren. Ende in deser hoechte stonden die wateren C ende L dagen boven alle aertrijck. Ende daer verdranck alle dat levende was, behalven Noe mitten sinen die in die arke waren. Daerna begonnen die wateren te minderen, ende opten selven dach als Noe in der arken ghegaen was, opten selven dach ghinc hi weder dairuut als dat jaer om ghecomen was. Doe Noe der overste paeus ende keiser des menschelicken gheslachtes mit sijnre huysvrouwe, mit sine III sonen ende hoer huysvrouwen uuten arken gegaen waren, soe heeft hi altehant een altaer gemaect, ende heeft God den Here offerhande gedaen van allen dieren ende beesten, ende riep God den Here an mit ghebeden, lof ende sange. Ende dat offer behagede God, ende was Hem ontfanclick. Ende God die Here ghebenedide hem ende sine kinderen mit eenre drievoudighe benedijnge, als mit vermenichvoudicheit⁴⁰ sijns gheslachts; ten anderen, mitter onderwerpinge aller levender creaturen; ten derden, mit toelatinge der vleislicker spijsen, welcke spijse des vleis is verhengt ende toeghelaten om der onvruchtberheit willen der aerden, diewelcke onvruchtberheit vermeert is ende groter gheworden na der diluvie dan te vorens. Noe, die goede man, leefde na der diluvie CCC ende XL jaer; ende in derselver tijt, behalven die drie sonen Sem, Cham ende Japhet, ghewan hi noch sonen ende dochteren. Ende als Phijlo, een Juesch meester, scrijft, soe heeft Noe gesien sine kindere kints kinderen, die van sinen III sonen ghecomen waren, ende waren gewassen ende vermenichvoudicht in den ghetale van XXIIII M mannen, behalven die wiven ende kinderen. Ende doe Noe out was IX C ende L jaren, starf hi, ende cort daernae versameden alle die gheslachten van Noes kinderen gecomen, ende coren III hoeftmannen ende vorsten, die se regeeren souden, ende bestonden te bouwen den groten toorne van Babilonien, beducht wesende dat die werlt weder mitten water vergaen soude. Also lange als Noe levede, soe ontsagen ende vreesden hem die gheslachten, ende hilden hem voer enen keiser ende here; ende hi onderwees ende leerde hem luden te leven nader regele des gherechticheits Goods. Mer soe drade als hi doot was, hebben si hem op gerecht tegen God, ende sijn ghevallen in groten vulen stinckenden sonden.

39 aldus A; ende ontbr. B.

40 aldus A; vermeuichvoudiheit B.