Gründtlicher Bericht, ob Zauberey die argste vnd grewlichste sünd auff Erden sey

Das Erste Capitel.
Allerley Eynred, das kein Zauberey, vnd demnach auch keine Zauberer seyn sollen.

1. Eynred.

Es ist kein Zauberey. Ergo seind auch keine Zauberer, &c.

Antwort.

⁺ES seind auch etliche funden welche für geben, das kein teuffel sein sollen, auff das immer der teuffel meister vnd vnuerhindert in seinen teuffelischen rencken bleiben möge: Dann da dem also, were kein noch wider den teuffel zustreiten nach auch für den selben sich zu förchten, zu bewaren, oder sich zu segnen, &c. damit dann der teuffel anders nit suchet, als

+ Vide Bensf. de Conf. malefi. in latinè Exempl. praeludio primo pag. 3. in germanito exempl. pag. 2. & 3.

[p. 155]

Gottes wort vnnd Gott selbs zum lügner, die Menschen frech, vnd sicher, sein reich aber stärcker vnd grösser zumachen, on einig verhindernisz vnd widerstant, vnd die leut mit hundert, ja mit tausenden in allerley sünd, vnnd entlich in die ewige verdamnusz zu stürtzen. Also wolte auch der teuffel durch seine diser zeit erwehlte Werckzeug, vnd liebe getrewen, die Menschen gern fälschlich vberreden, das keine zauberey vnd demnach keine zauberer, vnnd also Gottes wort falsch sey, die H. Kirch vnnd gantze Christenheit dises fals jederzeit gröblich vnd verdammlich geirret, vngütlich etliche personen der zauberey bezüchtiget, vnnd tyrannisch, wider alles recht vnnd pillichkeit die vnpillig beschuldigte zauberer am leib gestrafft vnd verbrant haben. Solte es gern dorthin bringen, das man in mit seinem zauberischen hauffen nur vnbedacht vnd vnuerhindert Gott lästern vnd schenden, die menschen, ja schier die gantze Welt verfüren vnnd betrüben lasse. Das aber zauberer vnd zauberische teuffelische künsten seyn, bezeugt vnnd beweiset die H. Schrifft, welch wir durchausz zuglauben schuldig, hell vnd sonnen klar Dann also steht geschriben. 4. Reg. 9. Deiner Mutter Jezabels Hurerey vnd Zauberey (sprach Jehu zu dem König Joram) werden immer grösser. Als Paulus die werck des fleisches erzehlet, welche vns schliessen ausz dem himmlischen Erbtheil, setzet er vnder andern, vnkeuscheit, abgötterey, zauberey. Gal. v. In der Offenbarung Joannis am 9, cap.

[p. 156]

sagt er von der straff deren, welche nicht gebüsset haben ihre Mörderey, Zauberey, noch ihre Hurerey, &c.

2. Eynred.

Es seyn kein zauberer noch zauberin, Ergo thut man den Leuthen gewalt vnd vnrecht, die man darfür achtet, oder der Zauberey bezüchtiget.

Antwort.

1. Dieweil zauberey ist, wie die H. Schrifft, vnd auch die tägliche erfarung bezeuget, so folget auch, das zauberer sein müssen.

2. Gott hat befolhen das man kein zauberer beim leben lassen solle. Exod. 22. Ergo so müssen zauberer seyn.

3. Exod. 7. Geschicht ausztrucklich meldun von der zauberey vnnd zauberern in Egypten bey dem König Pharao, welche Mosi vnnd Aaron widerstrebten, vnnd den Pharao verblendten.

4. Wie der König Manasses gezaubert, vnd zauberer vnderhalten hab. Stehet geschriben, 4. Reg. 21. vnd 2. Par. 33. Das ich ander örther vnnd zeugnussen des alten Testaments geschweige.

Im newen Testament meldet S. Lucas von dem zauberer Simon vnnd seiner zauberey. Acto. 8. Den forchtsamen spricht S. Joannes in seiner offenbarung, am 21. cap. vnd vnglaubigen, vnd verbanten vnd Todtschlägern vnnd Zauberern, &c. der theil wirt sein in dem Theich

[p. 157]

der mit fewr vnd schwefel brennet. Item, Apo. 22. Aussen seind die Hund vnnd Zauberer, &c. Will geschweigen, das die H. Catholische Kirch, welche vermög der H. Schrifft ein grundtfest vnd pfeiler der warheit ist, jederzeit dasselb glaubt vnd gelehrt, auch die sträffler gehalten hat. Der wegen die das leugnen, Ketzer vnd Vnglaubige sein, Gott vnd sein wort lügenstraffen, &c.

3. Eynred.

Exod. 22. Ist nicht von den Zauberern, sondern von den Gifftgebern, die mit gifft leiblich tödten oder schaden, zuuerstehen. Ergo.

Antwort.

Hieuon ist oben gesagt im 2. Capit. des 4. Tractats, vnd beide ausz Catholischen vnd Sectischen Biblen bewisen, das malefici nit gifftgeber, sonder zauberer verdolmetscht vnd verstanden werden.

4. Eynred.

Man soll vnd musz nicht an die zauberey vnd zauberer glauben.

Antwort.

Man sol vnd musz zwar keinswegs daran glauben, wie auch sunst an keinen Menschen, sondern allein an vnd Gott soll vnd musz man glauben. Aber nechst dem musz man gleichwol glauben, das zauberer vnd zauberey sey: dieweil Gottes wort dasselb ausztrucklich bezeugt, dem wir in allem, vnd auch in disem zuglauben schuldig seyn, welchs warhafftig vnd zu glauben gepotten, dieweil es Gottes wort zeiget: vnnd an

[p. 158]

zauberey oder zauberern glauben, welches Gott vnd Gottes wort zu wider, vnd zu glauben verbotten ist Gleich als auch nicht einerley ist: glauben, das dieb vnd mörder vnd sonst andere schelmen seyn: vnd aber ein anders, an dieb vnd mörder, &c. glauben.

5. Eynred.

Die alte verkakelte weiber lassen sich fälschlich vberreden vnd düncken dasz sie zaubern können, vnd ist nur lauter teuffels betrug.

Antwort.

Nicht allein alte, sonder auch die junge: nit allein arme sonder auch reiche, habselige, vnnd nach der Welt, verständige Weiber, jha auch sunst Weltweise vnnd auch Hochverstendige Menner wissen vnd bekennen, vnd habens auch offentlich vor jedermenniglich bekant vnnd gestehen müssen, das sie zauberkunst gewiszt vnd geübt haben. Wie hieuon in malleo maleficarum in die längd, vnd sunst auch in Confessione maleficarum, bey Bensfeldio zuerfinden, dahin ich den Leser wölle gewisen haben.