Gründtlicher Bericht, ob Zauberey die argste vnd grewlichste sünd auff Erden sey

Das X I I. Capitel.
Die xj. Special vrsach, warumb so vil zun Zauberern werden: nit zu gepürlicher zeit, oder vnwürdig zum h. Sacrament gehn.

WElche wissentlich vnd auffsetzlich, entweder nicht gebeicht, vnnd mit tödtlichen Sünden, vnd vnbuszfertigem Hertzen gleichwol zum heiligen Sa-

[p. 76]

crament des Altars, oder allerheiligsten Fronleichnams Christi gehen vnnd dasz selb eben als Judas der verräther vnuerschampt, vnnd vnwürdig empfangen vnd gleich andern rechtgebeichten vnd frombcatholischen niessen dörffen, ⁺ dieselb sein zwar schuldig am Fleisch vnd Blut des Herren, verschulden inen Gottes grewlichen zorn vnd ewige straff vnd kommen also zugleich in die gewalt des teuffels tieffer vnnd schwerlicher als andere Sünder. Daher dann auch Judas, da er den allerheiligsten Leib Christi, mit bösem vnbuszfertigem, verrätherischem hertzen empfangen, zumal gestürtzt: vnd dem der teuffel ⁺ zuuor ins hertz gegeben, dasz er Christum solle verrathen, in den ist der teuffel darnacher eingefahren, vnd hat ihn in seine macht gäntzlich bekommen. Wanneh aber der teuffel meister ist vber den Menschen, alsdann feiret er nicht, bisz dasz er denselben von einer Sünd zur andern, vnnd letzt zu der allermeister sünden bringt, wie dann war die verrhäterey Jude, vnnd darauff folgende verzweiffelung, vnd sonst neben dem, ist vnder andern Ketzerey, Zauberey vnnd dergleichen.

+ 1. Cor. 11.

+ Luc. 22.
Joan. 13.