Gründtlicher Bericht, ob Zauberey die argste vnd grewlichste sünd auff Erden sey

Das I X. Capitel.
Die achte special vrsach, warumb vil leuth zu Zauberer vnnd Zauberinnen werden: vnsinnige traurigkeit, vnnd misztrawen an Gottes hilff vnd gnaden.
Item: vngedult, &c.

VNmessige traurigkeit, verlassenheit des gemüts vnd kleinmütigkeit in creutz vnd trübsal oder sonst zeitlichem schaden gibt auch dem teuffel grosse vnd gelegene vrsach, dasz er allsolche (beuorab Weibspersonen) betrübte vnd bekümmerte menschen, durch betriegliche verheissung, dasz er sie trösten, gelts vnd guts, zu erstattung ihres schaden vnnd armuths verschaffen will, wanneh sie nur im vertrawen vnd folgen, vnd was er inen angesinnet, vollbringne wöllen. Vnd wann dann ein mensch, der betrübnusz vnd traurigkeit voll ist, vnd mensch

[p. 73]

liche mittel nicht weiszt, auch nicht recht auff Gott trawet vnd bawet, begerlich ist, hilff vnnd trost, sie komme waher sie komme, zugeniessen: also geschichts, das vil sich eynlassen, des teuffels (welcher ihnen ahnfangs, in gestalt eines Menschen, weiszzuerscheinen) raht vnd gesinnen, das offt im ersten ahnhören nicht bösz, oder ein geringe Sünd scheint zu sein, zu folgen. Vnnd wanneh sie der schelm also weit hat, vnd insonserheit, das sie gelt oder also etwas von im angenommen, welchs doch gemeinlich nur gelt scheint vnd Pferdsmist vnd ander vnflat ist, dann bringt er sie forth gäntzlich in seine gewalt, vnd zwingt sie auch, welche er weiszt von Gott deszhalb verlassen, das sie weiters seinen willen thun vnnd folgen, vnd fürnemlich zauberey lernen vnd treiben, vnd auff die zauberische beykumpsten folgen vnd erscheinen müssen.