Gründtlicher Bericht, ob Zauberey die argste vnd grewlichste sünd auff Erden sey

Das V. Capitel.
Beweisz vnnd Exempla, ausz dem alten Testament, das nicht allein die Zauberer zu gnaden kommen mögen, sondern auch etliche sich bekert, vnd gnad erlangt haben.

ES mocht villeicht, jemandt gedencken, oder fürwenden, ob wol war, das Gott könne auch wölle alle Sünden durch Christum den rechtpüssenden vergeben: so erfolgt doch nicht, das darumb auch die zauberer vnd zauberinnen sich bekeren können, oder jemaln sich bekehrt, vnnd gnad erlangt haben. Derowegen stehet vns solchs ausz Gottes wort ferners (denen zu trost, die gern solten, da sie mochten, der zauberey bey zeiten abstehen, vnd

[p. 53]

nicht darinn zur Hellen versincken) zubeweisen.

Im alten Testament (das ich andern geschweige) haben wir ein ausztrucklich Exempel von dem zuuor vber alle masz gottlosen, abgöttischen, tyrannischen, vnnd darzu zauberischen König Manasse, daruon die Schrifft also zeuget:

Manasse war zwölff jahr alt, da er König ⁺ ward vnd regiert fünff vnd fünfftzig jar zu Jerusalem, vnd thet vbel für dem Herren, nach den grewelen der Heiden, welche der Herr für den Kindern von Israhel vertriben hat, vnd kehret sich vmb, vnnd bawet die hohen die sein Vatter Ezechias abgebrochen hatte, vnd stifftet (dem Abgott) Baalim Altar vnd machet Wäld vnd bettet ahn allerley heer ahm Himmel, vnd dienet inen. Er bawet auch Altar im hausz des Herren, dauon der Herr geredt hat: Zu Jerusalem soll mein Nam sein ewiglich. Vnd bawet Altar allerley heer (das ist dem gestirns vnd Planeten) am Himmel, in beiden Höfen am hausz des Herren. Vnd er liesz seinen Son durchs fewr gehen (dem Abgott zu ehren) im thal des Sons Hennen, vnd wehlet tag, vnd achtet auff Vogel geschrey, vnd (merck) zauberte, vnd stifftet Warsager vnd Zeichendeuter, vnd thet das dem Herren vbel gefiel inen zu reitzen. Er setzt auch geschnitzt vnd gegossen abgöttische Bilder vnd götzen, die er machen liesz, im hausz Gottes, daruon der Herr Dauid geredt hat, vnd Salomon seinem Son: In disem hausz zu Jerusalem, die Ich erwehlet hab, für allen stemmen Israhel, will ich

+ 2. Par. 33.
Manasse ist ein Zauberer gewesen, vnnd gleichwol zugnaden kommen, da er gepüsset Manasses gröste vnd grewlichste Sünden.

[p. 54]

meinen Namen setzen ewiglich, vnd will nicht mehr den fusz Israel lassen abweichen vom land das ich iren Vättern bestelt hab, so fehrn sie sich halten das sie thun alles was ich inen gepotten hab, inn allem gesetz, sitten vnnd rechten durch Mose. Aber Manasse verführt Juda, vnnd die zu Jerusalem, das sie ärger theten, dann die Heiden, die der Herr vor den Kindern Israel (welche gemeinlich Zauberer vnnd Warsager &c. gewesen) vertilget hat. Vnd wenn der Herr mit Manasse vnd seinem Volck reden liesz (durch die Propheten, vmb sich zu bessern) haben sie es nit wöllen ⁺ achten. Auch vergosz Manasse sehr vil vnschuldigs bluts, bisz dasz Jerusalem zum mund voll ward, ohn die Sünd darmit er Juda sündigen machte.

Möchte auch ein Mensch grewlicher, vnnd grösser Sünd vnd Laster begehn?

Wiewol gerhürter Manasse, also ein grewlicher vnd Landtsünder war, vnnd so vil tausent von seinen Vnderthanen, vnd sonst Propheten, so geistlich, so leiblich vmmbracht, darzu ein zauberer selbst, ein anstiffter vnd Patron der zauberer warsager vnd teuffelskünstner war. So hat er gleichwol bey Gott gnad vnnd vergebung seiner sünden erlangt, dieweil er Gott vmb gnad gebetten, vnnd hertzliche Busz vnd penitentz gethan. Ja ist noch einer von den Vorfaren Christi gewesen, vnd in der geburtlini Christi gesetzt, vnder die Patriarchen, ausz welchen Christus nach dem fleisch geborn, vnd Mensch worden ist.

+ 4. Reg. 2.

[p. 55]

Das aber Manasse Busz vnd penitentz gethan, vnd von Gott auch zu gnadauff vnd ahngenommen ist, bezeuget dieselbige H. Schrifft weiter mit disen worten.

Darumb (weil Manasse also grob gesündigt ⁺ mit seinen Vnderthanen, vnd nit wolten Gottes warnung annemen zur besserung) liesz der Herr vber sie kommen die Fürsten des heers des königs zu Assur, die namen Manasse gefangen, mit fesseln, vnd bunden ihn mit Ketten, vnd sie brachten in gehn Babel. Vnd da er in der angst war, flehet er für dem Herrn seinem Gott, vnd demütiget sich sehr, vnd thet grosse Busz für den Gott seiner Vättern batt vnd flehet ihen. Da (merck) erhöret er sein flehen, vnd bracht in wider gehn Jerusalem zu seinem Königreich.

+ 2. Par. 33. Manasses Busz vnd penitentz, vnd wie er darzu verursacht.