Gründtlicher Bericht, ob Zauberey die argste vnd grewlichste sünd auff Erden sey

Das I I. Capitel.
Das die Zauberer vnnd Zauberinnen die wurtzel, vnd das fundament der bekerung vnd gnaden vmbgerissen, vnd verloren haben.

[p. 46]

ALs lang ein Sünder, wie grob, lang, vnd schentlicher gesündiget, den Glauben nicht verleugnet, sondern auch behalten hat, kan er noch durch den glauben Gott vmb gnad bitten, durch GOTTES gnad sich bekeren, Busz vnnd penitentz thun, vergebung der Sünden erlangen, vnd selig werden. ⁺ Ohn glauben aber ist es vnmüglich Gott zuberhagen, zu Gott erscheinen, Gott bitten, Busz oder Penitentz, die Gott gefellig, verrichten. ⁺ Jha welche nicht glauben, seyn im zorn Gottes, werden das leben nicht schawen, jha seynd schon ahn der Seelen todt, vnnd vor Gott verdammet. Nun haben die zauberer vnd zauberinnen keinen glauben zu Gott, sondern haben den glauben zusamen vnd gäntzlich verleugnet: seind dem glauben gentzlich vnd zumahl abgefallen: Haben sich also der lügen vnnd vnglauben samen vnd zumahl, wider ihr eigen Conscientz, wider die erkandte warheit, wider ihren Tauffeid vnd gelöbd, ergeben. Derwegen auch, als lang vnnd fehrn sie also seyn, haben sie eintzig mittel gnad zubegeren, oder zu finden, jha auch genad zu erkennen: können auch nimmermehr vnd in ewigkeit nicht zu genaden kommen, rechtfertig oder Selig werden. Welche den glauben nur in einem oder etlichen puncten verleugnet, können nicht rechtfertig, vil weniger Selig werden: Dann wer den gantzen Catholischen glauben nicht gewiszlich, gäntzlich vnd trewlich hat vnd helt, musz ohn al-

+ Heb. 11.

+ Joan. 3.

[p. 47]

len zweiffel verloren gehn: wie vil zu mehr der den gantzen Catholischen glauben wissentlich vnd auffsetzlich verleugnet, vnd mit ausztrucklichen worten abgeschworen hat, wie die zauberer vnd zauberinnen thun.