Gründtlicher Bericht, ob Zauberey die argste vnd grewlichste sünd auff Erden sey

Das X X I. Capitel.
Die Zauberer vnd Zauberinnen seynd ärger vnd gottloser als sonst respectiuè einige andere, auch die aller böseste Sünder.

1. Andere auch verstockte vnd böszste sünder, die sündigen gemeinlich entweder ausz blintheit böszheit, wollust oder böser gewonheit:

Die zauberer vnd zauberinnen, sündigen neben dem ausz hasz vnd trutz Gottes, den sie verlassen vnd verleungnet, vnd wegen des Bunds dem sie mit dem teuffel gemacht, alles ins teuffels namen, vnd im zu ehren, dienst vnd lieb zuthun.

2. Andere sünder die haben noch gemeinlich ein abschewen des teuffels, verfluchten vnd hassen den teuffel:

Die zauberer vnd zauberinnen, die lieben vnd ehren den teuffel.

3. Andere Sünder, ob sie gleich dem teuffel, wegen das sie sündigen, desz teuffels will vnnd

[p. 42]

raht folgen dienen, so betten sie doch denselben nicht persönlich vnd sichtparlich an:

Die Zauberer vnd Zauberinnen, die betten den teuffel sichparlich an, als iren Gott.

4. Andere Sünder haben noch Gott gemeinlich nicht mit ausztrucklichen worten verleugnet vnd abgeschworen:

Die Zauberer vnd Zauberinnen, die haben das offentlich vnd mit ausztrucklichen worten gethan.

5. Andere Sünder wie obstinat vnd verwüst sie auch seyn, buliern gleichwol mit teuffel nicht sichtparlich vnd fleischlich.

Die zauberer vnd zauberinnen, buliern vnd treiben fleischliche vnkeuscheit mit dem teuffel in sichtparlicher menschlicher gestalt, vnd werden, oder seyn also eben als ein Leib vnd geist mit dem teuffel.

6. Andere Sünder rüffen noch Gott biszweilen von hertzen an, bitten vmb gnad, nennen den nam Jesus mit andacht, segnen vnd verzeichnen sich met dem Creutzzeichen, vnnd thun vil guter werck nach gelegenheit, auch guter meinung.

Die zauberer vnd zauberinnen die thun des eins noch keins, oder nicht dann eusserlich, vnd im schein allein, aber nicht von hertzen (darinn der teuffel wonhafft, mit dem sie den teuffel ahn betten) sonder heimlich, vnnd bey ihnen selbst lästeren, schenden, vnd verfluchen sie GOTT, vnd was sie eusserlich thun, thun sie nur andern

[p. 43]

zubetriegen vnd ihre teuffelische boszheit zuuerbergen.

7. Andere Sünder, die gleich in den heiligen Geist sündigen, haben noch, oder können haben das fundament des Glaubens, vnnd also das mittel wider sich zubekeren vnnd gnad zu erlangen:

Die Zauberer vnd Zauberinnen haben auch (beuorab die ihr letzte vnnd höchste prosesz dem teuffel gethan) den gantzen glauben verlassen, vnd verleugnet, vnd kein mittel, alslang sie also pleiben, dadurch sie können oder möchten gnad entweder erkennen oder begeren, vil weniger gesinnen vnd geniessen.