Gründtlicher Bericht, ob Zauberey die argste vnd grewlichste sünd auff Erden sey

Das V. Capitel.
Die Zauberer vnd Zauberinnen, seynd ärger als Mamelucken.

Mamelucken sein menschen, welche etwan getaufft vnd Christen gewesen, aber nun zu dem Türcken oder vnglaubigen gewichen von Christlichen glauben gantz abgefallen seyn. Wiewol nun dieselb in demfall, ärger als Heiden oder Türcken seyn, dieweil die Heiden oder Türcken in Christum nie geglaubt, vnd demnach Christum nit verleugnet oder Christo nicht abgefallen seynd: dise verleugnete Christen aber seyn in Christo getaufft, vnd Christi erkentnusz vnd gnaden theilhafftig, Christo auch durch den Tauffeid vnnd sunst vilfeltig verbunden vnd verpflicht gewesen

[p. 12]

nunmehr aber an Christo eidt vnd glaubbrüchig werden: So seind doch alsolche Mamelucken respectiuè nicht so bösz vnnd gottlosz, als die getauffte zauberer vnd zauberinnen.

1. Dann die Mamelucken noch mit dem Türcken, irem wahn nach, einen Gott wöllen erkennen vnd bekennen, vnd demselben als irem eintzigen Gott dienen vnd anbetung beweisen:

Die Zauberer vnd Hexen aber, die verleugnen Gott zumahl, vnd auch die H. Dreyfaltigkeit, vnd ehren vnnd bitten an Gottes statt den leidigen vnd verfluchten teuffel an, auch in persönlicher vnd sichtbarlicher gestalt.

2. Die Mamelucken die haben noch ein grawen vnd schewen des teuffels, in eigener vnnd sichtparlicher gestalt:

Die zauberer vnd zauberinnen, die conuersiern mit dem teuffel nicht allein, sonder bulieren auch mit demselben, vnd vben erschröckliche fleischliche lust vnd vnkeuscheit.

3. Die Mamelucken brauchen sich nit wissentlich vnd sichtbarlich des teuffels hilff vnnd mittel, vmb andere, beuorab die von irem volck seind, an leib vnd leben, oder sonst an dem irigen zuuerderben:

Die Zauberer vnd Zauberinnen die bezaubern, beschedigen, vnd verderben ihre Mitchristen, Nachpaurn vnd etwan glaubensverwanten, gut vnd wolthäter insonderheit.