Gründtlicher Bericht, ob Zauberey die argste vnd grewlichste sünd auff Erden sey

Das I I I I. Capitel.
Die getauffte Zauberer vnd Zauberinnen seynd ärger als die Türcken.

1. Die Türcken erkennen vnd bekennen einen lebendigen Gott, der Himmel vnd erden geschaffen hat: aber sie leugnen mit den Juden Gott den Son, vnd Heiligen Geist, leugnen die H. Dreyfältigkeit.

Die getauffte zauberer vnd zauberinnen verleugnen den lebendigen Gott, vnd darzu auch die Heilige Dreyfaltigkeit, die sie einmal erkant vnd bekant haben.

2. Die Türcken betten nit den Teuffel, sonder Gott ahn, souil sie den selben ihrem duncken nach erkennen:

Die getauffte Zauberer vnnd zauberinnen betten nit Gott, den sie erkant, aber verleugnet haben: sonder sie beten den Teuffel an sichtparlich, den sie an Gottes statt angenommen, vnd sich ime verpflichtet haben.

3. Die Türcken haben Christum nie angenommen für iren Messiam, sonder bekennen, das er sonst ein H. Mann vnd Prophet Gottes gewesen sey:

Die getauffte Zauberer vnd Zauberinnen, haben Christum für Gottes Son vnd iren Messiam zwar erkant vnd angenommen, aber nun mehr verlassen vnd verleugnet, lästern vnd schän

[p. 11]

den denselben wider ihr gewissen, dem teuffel zu ehren vnd wolgefallen.

4. Die Türcken hassen vnd schewen den teuffel irem düncken nach, vnd haben mit ihm wissentlich vnd scheinbarlich kein gemeinschafft:

Die zauberer vnd zauberinnen lieben vnd ehren den teuffel, vnd bulieren mit demselben persönlich in sichtparlicher gestalt wissentlich vnd fürsetzlich.

5. Die Türcken beschedigen vnnd verderben ire mit Türcken nicht, sonder seyn einander behülfflich vnd beystendig:

Die getauffte zauberer vnd zauberinnen bezaubern, verderben ire mit Christen vnmenschlich vnd vber die masz vngütlich, solches ausz hasz vnd trutz Christi. dem teuffel zu vnderthenigen gefallen.