Zwolsche kroniek van 1520 tot 1526

Littera Tribunorum Zsuollae.

Alsoe de stath Zsuolle versekert is dat onsse g.h. van Wttrecht verbont begheert hefft te maken mitten hartoech van Gelder, omme de stath Zsuolle tstraffen, hoe well dat sine ghenaden daer recht noch reden inhefft. Ende niet teghenstaende de stath Zsuolle van Campen soe merckeliken veronrecht is, des de stath Zsuolle sich ten rechte opt wtterste ghesubmittiert hefft etc.; heyr omme ende omme ander redelike oersaken hefft de raeth mitter ghesworner ghemeenten mit een ander overdraghen ende enen heren tot behoeff van sinte Marten, in hopen namaels bisscop Tutrecht te werden, toe ontfanghen ende den eendrachteliken huldinghe ende eden te doen; hoer stath, lyff ende gueth te beschermen dat mit malkanderen helpen wyth te draghen ten wijttersten toe. Ende dit niet toe melden bij verbortenisse ende verlisinghe ellic hoers liues ende gueths. Dess in kentenisse hebben raeth ende ghemeente dit mit malkanderen gheswoeren ende mijt hoeren handen ende merken onderteekent. Actum op vridach nae visitationis Mariae Anno domini etc. xxi Ende

[p. 16]

off hyer ijmans van hoerde segghen in 't hemelic off int openbaer, sall dat wijth brenghen ende den raeth melden by sinen live.

Item soe nu de raeth dyt dus van der ghemeente gheteikent hadde, soe ghenghen sy noch meer te werke. Nochtans nae ludinghe der hantscrijfft vorscr. soe hebben de ghemeente niet meer opghedraghen dan de stath Zsuoll ende niet dat ghemene lant. Ende dat het all man niet en wijsth, dat brenct dyt hantscryfft mede, want sy en solden op hoer lyff nymans hyr van segghen. Sus en is dyt all man niet kondich ghewest, dan all bedect.

Item soe screeff men daer enen dach an ther Nyer Brugghen, daer sich mijnsz g.h. raeth mitten steden solden dach holden tot wellwaert des lantz soe sy seden en dessen dach sint niet ghecomen de van Zsuolle, mer se hebben hemeliken wythghesant Harman ten Torne, de den vorst van Gelder solde ontdecken dessen dachuaert voerscr. Soe hefft de vorst ghesacht: ic hebbe nu wennich ruter by mij, dat ic in een etmaell gheen vyfftich ghewapend op kan brengen; dus Harman ic sall u mede doen xxxvi ruter mit ii ronne vanekens, neme ghyt ene ende trumpetter. De fortune sall u toe slaen. Ende sinne ghetoghen daer sy op de dachuaert stonden in mynsz g.h. lant in een tyt des vredes ende hebben ghetractyert omme de zake des toellsz neer toe legghen. Ende sinnen soe oneerliken daer ghevanghen, niet wetende van ijmansz comst ende hebben daer ghevanghen Adriaen van Rede, Aloff van Rutenberch, Jan van Buckesberghen, Volkijer Sloet, de se in Zsuolle hebben ghevuert. Ende Jan van Twyckell, Zweer van der Ese ende meer, de worden de hant

[p. 17]

ofghenoemen ende voeren op hoeren eeth; ende Deventer, Campen, de drost van Dipenhem ende de ontforen hem soe dat syt oeck all nijet konden vanghen. Dit gheschede den x dach in Julio Anno xxi. Ende hebben Zsuolle schyer ii jaer gheseten ende hebben groet gelt verteert ende men sede hen grote verrederije nae, mer der was nymant van den Gelderschen de teghenwordich by eerlike lude dorste coemen en segghen sulx over daer sy by baden lyff ende guet ende hem overgheven in des duvels macht, dat men sulx hen numermeer over bewysen en solde, dat sy ghetractyert hadden anders dan tot vrede ende eendrachticheit der steden. Adriaan van Rede de moste zijn huiss Zaesfelt gheven voer syn rantsoen den Hartoch van Gelder. Ende Aloff van Rutenberch xii honderd golden gulden, behalve dat sy hem to schade deden an syn guet. De anderen hadden groet gelt verteert; daer quemen sy mede loss. Ende den burgheren makede de raeth wijss: seet wij hebben sy hijer sitten in den stockke. De sullen alle uwen schaden, de w an besten ghedaen is, van dessen opgherict worden. Dyt weren niet dan flabiten; de voer(s?)t de leet se schatten nae sinen wille, doe wy se alder langhest hyer gheholden hadden. Desse ansclach en wysth nymant in den raeth soe se ghesworen hebben, dan Jan van den Bussche ende Jacop van Wytman, de Herman ten Torne wyth senden.

Item soe hebben de raeth tsamen sonder consent der meenten een ansclach ghemact op Hasselt. Soo hebben Jan van den Busche ende Jacop van Wytman mede ghenoemen een deell gueder burgheren myt ii scepen ende sinnen nae Hasselt ghetoeghen daer de mysten

[p. 18]

hop niet van wysten, waer sy hen solden. Ende Michiell van Bomeren de quam sy an met een deel ruteren van Hattem ende toech mit hem nae Hasselt. Comende daer, soe was hoer ansclach ghemeldet Zutphen, soe vragheden sy ant schypp van Zsuoll wat het gheladen hadde. Dat ene wolle, dander bentemer steen. Wy sullen well syen. Soe sint sy ghecomen met hevelen ende hebben willen dat portken opbreken, soe ghenct de clock. Anboert se worpen met pannen en schoten myt bussen, dat sy mosten wyken. Michyels schypp quamm wech ende Jan van den Busch; Jacop van Wytmans schip bleeff op te pale hanghen ende der bleef well vijer doet ende sy beden dat sy ghevanghen wolden nemen, sy wolden hem dusent gulden gheven, sy sorghenden voer hoer lyff. Ten leste sy sint anghehaelt en well xx sterck ghevanghen. In de stat comende wolden sy se all doet slaen. Doe hefft Jacop van Wytman hen ghesacht, hoe se niet op hoer argheste daer niet en weren, dan dat gheen quaet en solde ghescheen wyth Hasselt van myn g.h.; dat ellic by den sinen solde bliven ende dat hem de stath Zsuolle des een hovet wolde syn, wes hem daer over queme. Daer sy op antwoerden: slae doet de verreerss; myn g.h. hefft ons niet mysdaen. Het solde ons gheholden werden, ghelic alse alder wechen deden, de sy over quemen. Dus sint sy ghevenckelicken ghesat. Soe is ghecoemen Michiell Ernst mitter stat Zuolle mit gheschott ende begheerden weder te hebben de ghevanghen; ten losten ghesloten men solde hem de ghevanghen weder doen, sy solden off trecken, aldinc vergheven ende vergheten. Soe sint sy wyth gelaten en hebben dessen navolghenden eeth ghedaen als hyr gheset staeth: