Watapana. Jaargang 3

[p. 4]

Entrevista ku ‘Osculda’
(Organisashon Social i Cultural di Damanan Antiyano)

Osculda a lanta na 1963, pa demonstrá ku amanan di kas Antiyano ta interesá nan mes tambe pa otro kos ku solamente trabow di kas i edukashón i kriansa di ju, i pa juda amanan di kas riba terreno sosial, ekonómico, etc. i pa mustra nan riba nan responsabilidad den nos komunidad.

Pa realisá e métanan aki Osculda a organisá kaba diferente kurso riba e tópikonan ‘Credito di consumo’, ‘Bida sosial na Corsow’, ‘Verenigingsleven’.

Siguiendo den e mes rumbo e damanan di Osculda a lansa awor un akshón enorme bow di nomber ‘Bam kibra e barrera’, ku kwa Osculda ke alkansá e hendenan studiá: akadémikonan i otro specialistanan Antiyano pa purba trese nan más serka di pweblo Antiyano.

OSCULDA: ‘Nos specialistanan ta pará ahinda lew for di pweblo, nos kier trese nan más serka pa yuda nos eduká nos pweblo asina ku huntu nos por sinja konose nos problemanan i buska solushon pa nan na nos bienestar.’

Den káder di e akshon aki, ya Osculda a tene charlas y panels. Un di e problemanan ku Osculda ke ataká ta esun di edukashon na Antiyas, i riba e tópiko aki ya Osculda a tene un panel. (forum)

OSCULDA: ‘Na 1970 e sistema di enseñansa ‘Mamoet’ a drenta na vigor. Niun hende no sa kon e sistema aki ta traha, pero nos ta mira como resultado, ku e posibilidadnan, pa Antiyanonan hanja un bon edukashón, ta bira menos. Hopi mucha di 13 anja tin ku kita for di skol pasobra nan no por sigi e sistema nobo aki. Antiyas a kambia pa e sistema nobo aki, pa nos enseñansa por korrespondé ku esún di Hulanda. Pero na promé lugá, ta un grupo masha chikitu ta sigi studia despwés, no tin nodi di perhudiká tur e otronan ku despwés di skol ta bai traha. Na segundo lugá; ta di kon ta Hulanda nos mester bai si nos ke specialisá den kwalkier ramo? Tin hopi estudio ku nos por hasi aki den vesindario. Nos ta mira p.e. e sitwashon ku nos ta bai Hulanda pa studia Spañó mientras ku nos ta biba na Latino Amérika.

‘Mamoetwet ta na fabor di un grupito, es decir, e hendenan riku i Makambanan, i no na fabor di Antiyanonan póber ni esnan di “middenklasse”, mientras ta esakinan to forma e masa. P'esei Osculda ke pa nos specialistanan informá pweblo pa asina nos por tuma un desishón tokante nos enseñansa.’

Osculda ta desapuntá den e Antiyanonan ku ta bini bèk despwes di nan estudio na Hulanda ku ideanan Hulandés p.e. tokante ‘sociale wetten’. Nan no sa, ku nos no tin e leynan aki na Antiyas, nan no konosé e miseria ku ta eksistí akinan.

[p. 5]

Ora nan bini bèk, nan ta hanja nan mes den rámonan haltu di nos komunidad, kaminda tampoko nan ta ser informá tokante di esaki. Di kas pa trabow nan no ta pasa Fleur de Marie ni Buena Vista i nan no ta mira e nesesidad di trece kambio den e sitwashon inhumano den kwa hopi hende tin ku biba. Nos studiantenan mester buska pa konosé e realidad Antiyano.

Hopi studiantenan no kier bini bek mes, pa falta di e polítika ku ta duna hende trabow, no pasobra nan ta kapasitá, sino pasobra nan to afiliá ku sierto partido polítiko, Osculda ta di opinión ku pweblo mester protestá kontra e deféktonan aki den polítika.

Un otro grupo ta disidí di bai stranhería bek pasobra no tin trabow adekwá pa nan, mientras tin stranhero ta hasi e trabow ei. Embés di bai bèk, nan por eksihí nan pwesto i trece e asuntu na konosemento di pweblo asina ku nan por hanja apoyo.

En general nos specialistanan ta pará lew for di pweblo. Nan no tin kontakto ku pweblo i nan no konosé su problémanan. Osculda ta mira komo nan deber: afiliá nan mes ku pweblo, eduká pweblo i lucha huntu ku pweblo pa un mihó futuro.

Ll. R. NARAIN