Watapana. Jaargang 2

Resolushon final i algun rekomendashon
(tuma fo'i e Rapòrt Final di e Komishón ‘Fo'i hopi, un só’)

Den su rewnjón final di jüni 1961, e komishón akí a deliberá detajadamente riba texto final i definitivo di e rapòrt akí ku awó é ta presentá. Nos a tira un último bista riba djé den su konhuntu i a studia su diferente parti i aspéktonan. Despwés di algún modifikashón, tur mjémbronan di e komishón di ortografía akí, ku tábata presente, a firma e rapòrt akí manera nos ta present'é awó na Gobjèrnu i pweblo di Antíjanan Ulandés, na korantnan, radio, televishón, eskritornan ku ta publiká na papjamentu i esnán na nos tera ku ta interesá den papjamentu. Tá un di e posibilidatnan pa jega na un solushón final i definitivo; nos no ta pretendé ku tá e úniko.

E komishón akí ta konsjente ku ora ta trata di un asuntu serjo manera esaki, n' (por) tá opinjón partikular di un hende só (pa hustifiká i respaldá ku e opinjón ej por tá) tá loke mester prevalesé, sino e resultado di un gran esfwerso ofishal, realisá pa héndenan kapás pa hasi e trabòw ej. P'eséj, den su rewnjón final, nos komishón a tuma e resolushón final di no solamente presentá resultado di su trabòw den forma di e ortografía di transishón akí sino tambe di hasi algún rekomendashòn di karáktr práktiko, realisábl inmediatamente.

E rekomendashonnan ej tá:

a)	Formashón di un ‘Komishón di Papjamentu’, ofishalmente instituwí pa Gobjèrnu, pa studia e proposishón akí di e Komishón ‘Foi hopi, un só’, huntu ku loke Raúl Römer tin hasí kaba, pa presentá den sèjs luna di tem' un modèl di ortografía fiho i ofishal.
b)	Nombra den e komishón ofishal ej héndenan ku, pa nan formashón akadémiko spesjalisá (lingwístika) o pa nan experensja di hopi aña dediká na estudio i skirbimentu di papjamentu, por hasi un trabów asina ku éxito.

[p. 26]

E Komishón akí ta hasi dos proposishón separá tokante e komishón ofishal ej, esta: 1) Un komishón responsábl di tres hende, esta e 3 lingwístanan akadémiko ku nos país tin, pero ku lo por konsultá ku otro hende i forma supkomishón pa trabòwnan determiná. 2) Un komishón di nwebe hende, pa kwa nos ta rekomendá e sigjente héndenan: Raúl G. Römer, Jules Ph. de Palm, Luis H. Daal, Antoine J. Maduro, Enrique Goilo, pádr M. Latour, René A. de Rooy, Pierre A. Lauffer i Nicolás A. Piña.

c)

Enkargá e komishón ofishal ej ku tres kos konkreto, ku lo mester tá hasí déntr di un aña di tem': 1) Presentashón di un ortografía fiho, promé, esta, den sèjs luna di tem'. 2) Presentashón di un gramátika ofishal pa papjamentu, skirbí na papjamentu. 3) Presentashón di un vokabularjo mas ampljo posíbl, di palábranan bjew di papjamentu ku ta korjendo pelígr di baj pèrdí pasobra nan no ta ser uzá asina tantu manera antes, i tambe, inkorporá den e vokabularjo ej e neologísmonan (palabra i expreshonnan nobo) ku a drenta o ta drentando papjamentu último áñanan. 4) Dekretá di antemano ku resultado final di trabòw di e komishón ofishal ej i su rekomendashonnan lo tá desisivo, válido pa dies aña, pa poko, komo lenga, gramátika i ortografía ofishal di papjamentu, pa enter Antíjanan Ulandés. 5) Despwés di dies aña, e komishón ofishal ej (si tá nesesarjo, òwmentá ku otro lingwístanan, ju di tera, ku lo (por) a bini aserka, pa sustituwí esnán ku lo no t'ej mas o ku n' por aseptá e enkargo 'trobe), ta bolbe revisá e sitwashón pa nos adoptanos na loke experensja di dies aña lo a siñanos.

Komishon ‘fo'i hopi, un só’

Luis H. Daal, presidènt

Pierre A. Lauffer, sekretarjo

Salomón F. Curiel, komisarjo

Komishón di Ortografía

Luis H. Daal

Pierre A. Lauffer

Salomón F. Curiel

José M. Kroon

Guillermo E. Rosario

Jossy Kleinmoedig

Jossy Cijntje

René A. de Rooy

Nicolás A. Piña

Kòwsòw, jüni di 1961.