Watapana. Jaargang 2

[p. 18]

Ya no ta falta muchu mas

E sómbranan di atardi
ta drumí tur larg'i kurpa;
páranan ta buska nan lugá den mondi
i kabritunan ta baha pa kurá.

Mi mes ta sinti
tera di santana
sprengu den mi kara.
Djis aki ta or'i yama ayo.

Ma un deseo mi ke benta
den bosnan ku keda 'tras:
kaminda chapi kay for di mi man,
lant'e
i sigi bòltu tera gordo,
planta, kwida, kosechá
e lenga dardu di nos mama.

Esta dushi mester ta,
despwes,
pará un kantu, seka Tata Grandi
di por tende trup'i Yu di Tera
basha bin,
wapando ultimo sehú
n'e lenga bibu di nos tur.

Pierre Lauffer