Watapana. Jaargang 2

Nicolás Guillén: poeta antillano

Ora Antillanonan mester skoge entre nòmbernan di artista, pintor i eskritor, ku no a nase na Corsow, Aruba o Bonèiru, hopi biaha nan lenga ta chalalá: Rembrandt, van Gogh, Vondel, Hooft, òf, pa no keda chambuká den lodo di tempu biew: Vestdijk, Hoornik, Lucebert, Appel, van Ulzen, etc.

Si no ta Antillas (esta Corsow of Aruba), ta Hulanda. Nan ta siegá pa un enseñansa, ku a mustra nan solamente e kaminda di Willemstad pa Amsterdam i nan no ta mira ku mundo ta más hanchu. Ta un plaser pa ‘Watapana’ habri e wájer ku tin su skarnir na Corsow, pa nos mira kwántu rosa más ta drif den lamán di Caribe. Pa e biaha akí nos ke presentá na nos lektornan un poeta cubano, o mihó bisá, antillano, pasobra

[p. 7]

anke nasí na Cuba, su obra ta reflehá ambiente di tur e islanan, ku ta forma ‘Antillas’. Su nòmber ta Nicolás Guillén. El a nase na Camagüey na 1902, di majónan mestiso. Na aña 1921 el a bai studia derecho na Havana, pero pronto el a bandoná su estudio i a kuminsá dediká su mes más na literatura cubano. Tempu ku e poeta spañó, Federico García Lorca, a bishitá Cuba, el a sera konosí kuné.

Guillén su promé obra ta ‘Motivos de son’, publiká na 1930: ocho poema skirbi den ritmo di baile cubano.

Un aña despwés a sali su obra ‘Sóngoro Cosongo’, ku a pone Miguel de Unamuno dirigié algún palabra di elogio: ‘He vuelto a leer su libro y he oido hablar de usted a García Lorca. No he de ponderarle la profunda impresión que me produjo... Me penetró como a poeta y como a lingüista’.

Na aña 1934 a sigui un kolekshón di intenshón sosial i di más seriedat: ‘West Indies Ltd.’ Mas despwés a sali ‘Cantos para soldados y sones para turistas’ i ‘El son entero’.

Su sintimentu sosial, su solidaridat pa ku héndenan ku ta pasa hámber tur dia a kwaha den su obra ‘Paloma de vuelo popular’ di 1958. Su óbranan más resiente ta ‘Tengo’ (1964) i ‘El gran Zoo’ (1969). Aktwalmente Guillén, según Alejo Carpentier¹ a informá nos, ta presidente di ‘Unión de escritores de Cuba’.

Obra di Nicolás Guillén ta meresé un atenshón espesial pa su témanan rasial.

Guillén ke mustra nos, ku un antillano no ta solamente un desendiente afrikano, sino un afro-eropiano (‘... se han corrido los tintes y no hay un tono estable’).

José Martí tambe a jega di trata e kwestión rasial di Cuba, pero desde un punto di bista polítiko: ‘En la guerra, ante la muerte, descalzos todos y desnudos todos, se igualaron los negros y los blancos: se abrazaron y no se han vuelto a separar’.

Nicolás Guillén su vishón di integrashón ta más bien un fenómeno sikiko. P'esèi é ta formul'é dje siguiente manera: ‘cueripardos o almiprietos / más de sangre que de sol, / pues quien por fuera no es noche, / por dentro ya oscureció.’

Esaki ta un dje témanan esensial di Guillén, esta na prinsipio di su karera literario. Pasobra a lo largo di su poesía, nos ta nota, meskós ku den obra di José Martí, un desarojo di su kombate anti- imperialista, anti-yankee.

Su ‘umanidat’ a pon'ele reakshoná kontra tur sorto di explotashón i loke Martí a jega di bisa (‘Nadie tiene derecho a dormir tranquilo mientras haya un sólo hombre infeliz’) ta e motor ku a promové su kreashón literario.

Majoría di su vérsonan ta basá riba e lema: ‘Libertat, Igwaldat i Fraternidat’.

Su obra a bira un síntesis di un integrashón rasial, un kombate kontra tur opreshón ekonómiko i un konstante protesta polítiko-sosial.

Aki nos tin keber ku un berdadero antillano, un antillano te den su higra!

1 Diplomátiko, musikólogo i òwtor cubano ku ta bibando na Paris.