E rais ku no ke muri:
komentá pa P.R. Velásquez
Den e ‘Cadushi-reeks’ (di Stichting Antilliaanse Literatuur) ku a habri na 1967 ku e nobela impresionante di Tip Marugg, ‘In de straten van Tepalka’, a sali awor komo segundo nobela ‘E raís ku no ke muri’ di Guillermo Rosario.
Apesar di e diferenshanan entre e dos nobelanan aki, ‘E rais ku no ke muri’ di Rosario no ta alkansá e balor literario di ‘In de straten van Tepalka’.
Rosario su intenshón di aktwalisá e figura históriko di Tula (siglo XVIII), di present'é komo un ‘revolushonario’ a faja, na mi opinión. Rosario ta lubidá ku un revolushonario awendía tin un ‘image’ rekonosíbel.
Kato (Tula), pa mas ku Rosario aplik'é e etikèt di ‘revolushonario’ no por wòrdu identifiká komo tal, pasobra é no ta duna mwestra di su ‘edeanan revolushonario’.
E entrebista di Kato ku Toussaint L'Ouverture por ilustrá e punto di bista aki: Kato, durante e entrebista èi - un momento ‘clave’ di e nobela - no tin nada esensial di bisa (en kambio Toussaint sí ta bon karakterisá den un tempo kòrtiko!).
Además Rosario no ta kondishoná - emoshonalmente - tampoko su personahenan sentral. E no ta kombensé lektor di e tremendo sufrimento ku e esklabonan i e mes Kato mester a pasa. T'esèi ta loke mester a kòwsa su indignashón i hib'ele na e lantamento.
Mirá den e lus aki e nobela den su totalidat falta di tenshón dramátiko, elemento indispensábel pa e nobela.
Konektando na loke mi a kaba di bisa, m'a ripará e defekto tékniko di Rosario: é ta laga lektor pará pafó di akontesimento di interés. Rosario, en bes di habrinan, hinka bida den nan, ta laganan será, komprimí manera informashón dokumental. Asina un nobelista no ta laga su lektornan partisipá imaginariamente den loke ta pasando den e nobela. Pakiko, por ehèmpel, Rosario no ta konta en detaje e enkwentro, kombersashón di Kato ku su hendenan?
Rosario solamente ta señalá nan, siendo ku nan ta signifikatibo pa e orientashón - e lantamento - di e nobela.
E kontakto ku mester a tuma lugá entre Kato ku Miss Roda - otro momento ‘clave’ - no ta sigui, pasobra Roda ta malo. Parse ku Rosario ta saka kurpa pa e ‘esénanan intelektwal’ aki. (Ku ‘esena intelektwal’ mi kièr bisa esena, kaminda lektor ta konosé un personahe su manera di pensa).
Rosario, además, ta forsa e kambio interno di su personahenan sin un transishón. E kambio ta resultá inkreíbel. Asina nos ta mira Lala (awor Loretta Brunning) na Port-au-Prince transformá di repente den un dama aristokrátiko ku algún trasa di muhé blanko. E relashón di amor di Miss Roda ku Atanshi tambe ta forsá. Rosario ta laga Miss Roda, un muhé inteligente, pèrde su kabés pa Atanshi djis dor di ‘e postura firme di e hòmber su múskulonan’. E namoramento èi, manera Rosario ta present'é, ta sikológikamente fásil, improbábel.
Sinembargo, Rosario tin biaha ta sedusí manera den e episodionan erótiko (pero nan ta episodio di segundo plano); e esena na unda Kato ta kontra Shon Gerta den estado demente ta impresionante (pero insidentalmente); i den e
Auteursrechtelijk beschermd